Almatyda qarjy pıramıdalarynyń 7,7 mlrd teńgesi buǵattaldy

ALMATY. KAZINFORM — Almatyda 2025 jyldyń 7 aıynda 1 myńnan astam adam zardap shekken 10 alaıaqtyq joba toqtatyldy.

Almaty qalasy boıynsha ekonomıkalyq tergep-tekserý departamenti basshysynyń orynbasary Sabyrǵalı Balǵalıulynyń aıtýynsha, ınternette alaıaqtyqty nasıhattaýǵa qarsy kúresetin mańyzdy quraldyń biri — «Kıberbaqylaý» aqparattyq júıesi arqyly 846 jarnamalyq silteme buǵattalǵan. Odan bólek jyl basynan beri departament qala boıynsha qarjy pıramıdasyn uıymdastyrǵan 10 júıeniń jolyn kesti. Onyń ishinde 6 qylmystyq is sotqa jiberildi.

Tergeý barysynda 7,7 mlrd teńge kóleminde pıramıda uıymdastyrýshylarynyń bank shotyna, jyljymaly jáne jyljymaıtyn múlkine tyıym salyndy.

— Mysaly, «ÚILІ BOLAIYQ» deıtin jalǵan áleýmettik jobanyń jumysy toqtatyldy. Olar ózin qaıyrymdylyqpen aınalysatyn turǵyn úı baǵdarlamasy retinde kórsetip, paıyzsyz bólip tóleý arqyly úı alyp beremiz, salym somasynyń 15–30% mólsherinde tabys tabasyzdar dep aldap, osy júıege adam tartqandarǵa bonýs bermek bolǵan. Biraq aqshanyń bári uıymdastyrýshylardyń jeke shotyna túsip, qordyń esepshotyn múldem qoldanbaǵan. Olar sóıtip 515 salymshydan 50 mıllıon teńgeden astam qarjy jınaǵan. Qazir kúdiktiniń bank shotyna tyıym salynyp, oǵan qatysty elden shyqpaý týraly qolhat túrindegi bultartpaý sharasy qoldanyldy, — dedi Sabyrǵalı Balǵalıuly.

Sonymen qatar ol qazirgi ýaqytta «Warner Bros», «Roborock» jáne «NFT+TRX» ataýymen taǵy úsh júıege qatysty qylmystyq is tergelip jatqanyn atap ótti.

— Tergeý jalǵasyp jatyr, nátıjesin ýaqtyly jarııalap otyramyz. Qarjy pıramıdasyna ár adam óz erkimen jáne zań aıasynan tys kiredi. Sondyqtan salǵan aqshańyzdy qaıtarýǵa eshkim kepildik bermeıdi. Degenmen keı jábirlenýshilerdiń aqshasy qaıtaryldy. Shyǵyndy óteý týraly sheshimdi tek sot qabyldaıdy, — dedi Sabyrǵalı Balǵalıuly.

Almaty qalasynyń ekonomıkalyq tergep-tekserý departamenti kúmándi uıymdarǵa baılanysty Jibek Joly dańǵyly, 127 mekenjaıy boıynsha nemese 1458 nómirindegi Call-ortalyqqa jedel túrde habarlasýdy ótindi.

Eske salaıyq, buǵan deıin Almatyda «Matic Basket» qarjy pıramıdasy 2 myń adamnyń 80 mln teńgesin qoldy etkenin jazǵanbyz.