Almatyda qarjy pıramıdalaryna qatysty 8 mlrd teńgeniń múlkine tyıym salyndy

ALMATY. KAZINFORM — Keıingi eki jylda Almatyda qarjy pıramıdasyn quryp, olarǵa basshylyq etkenderge baılanysty 20-ǵa jýyq qylmystyq is qozǵaldy.

Almatyda qarjy pıramıdalaryna qatysty 8 mlrd teńgeniń múlkine tyıym salyndy
Foto: pixabay.com/Max Zolotukhin

Almatydaǵy ekonomıkalyq tergep-tekserý departamenti jedel basqarmasynyń basshysy Dılar Kýgabaevtyń aıtýynsha, tergeýdegi isterdiń aıasynda jalpy somasy 8 mlrd teńgeden asatyn múlikke, aqsha men tsıfrlyq aktıvterge tyıym salynǵan. Sonymen qatar alaıaqtyq ınvestıtsııalyq shemanyń belgisi bar 2 myńnan astam ınternet-silteme buǵattalǵan.

Spıker departament negizgi mindetiniń biri — azamattardy kúmándi jobalarǵa jappaı tartý bastalǵanǵa deıin qarjy pıramıdalaryn erterek anyqtaý ekenin atap ótti. Alaıaqtar salymshylardy saıt, áleýmettik jeli men jarnamalyq habarlandyrý arqyly belsendi túrde tartatyn ınternet keńistigine kóńil bólinedi. Mundaı resýrstardy anyqtaý úshin «Kıbernadzor» aqparattyq júıesi qoldanylady.

— Kóp tabys tabamyn degen úmitpen adamdar keıde bar múlkin tigip jatady: jalǵyz baspanasyn, kóligin satady, bankten nesıe rásimdeıdi, iri kólemde qaryz alady. Osy qarajattyń barlyǵyn tez baıyp ketýge bolady degen senimmen kúmándi jobalarǵa salady. Alaıda biraz ýaqyttan keıin ýáde etilgen tabystyń jalǵan ekeni, al jobany uıymdastyrýshylar tólemdi toqtatyp, salymshylardyń aqshasymen izin sýytqany belgili bolady. Nátıjesinde azamattar jınaǵan qarajatynan aıyrylyp qana qoımaı, kóbine mıllıondaǵan qaryzǵa batady, — dedi ol.

Almatyda qarjy pıramıdalaryna qatysty 8 mlrd teńgeniń múlkine tyıym salyndy
Foto: Almaty óńirlik kommýnıkatsııalar qyzmeti

Dılar Kýgabaevtyń sózinshe, qazirgi qarjy pıramıdalarynyń syrtqy kórinisi burynǵydaı ashyq alaıaqtyq uıymdarǵa uqsamaıdy. Tartymdy tabys týraly usynystyń artynda kóbine alǵashqy qatysýshylarǵa tólenetin qarajat jańa salymshylardyń esebinen qalyptasatyn shemalar jasyrynyp jatady.

— Qazirgi qarjy pıramıdalary azamattardy tartý tásilin únemi jetildirip, zańsyz áreketin zańdy ınvestıtsııalyq joba retinde kórsetedi. Búginde olar jelilik marketıng, tutyný kooperatıvteri, ınvestıtsııalyq platformalar, krıptovalıýta jobalary men kásipkerlik qyzmettiń basqa da túriniń atyn jamylyp jumys isteýi múmkin. Sondyqtan halyqtyń qarjylyq saýattylyǵyn arttyrý kerek, — dedi departament ókili.

Maman yqtımal qaýipti ınvestıtsııalyq jobalardy anyqtaýǵa kómektesetin alty negizgi belgini atady. Birinshisi, eshqandaı táýekelsiz joǵary ári kepildendirilgen tabys ýáde etý. Eger kompanııa salymdardyń múldem qaýipsiz ekenine sendirip, aı saıyn ondaǵan paıyz nemese jyldyq júzdegen paıyz paıda usynsa, bul — saq bolýǵa negiz bolatyn mańyzdy belgi.

Ekinshi belgi — jańa qatysýshylardy únemi tartý qajettiligi. Uıymdastyrýshylar týystardy, dostar men áriptesterdi shaqyrýdy usynyp, ár jańa adamǵa syıaqy berýge ýáde etedi. Alaıda tólemdi kompanııanyń naqty tabysynan emes, keıinnen qosylǵandardyń aqshasynan berýi múmkin.

Úshinshi kúmándi belgi — áleýmettik jeliler men messendjerlerdegi jarnama. Paıdalanýshylarǵa qarjylyq táýelsizdik, joǵary passıvti tabys jáne sheteldik ınvestıtsııalyq jobalar arqyly aqsha tabýdy usynady.

Tórtinshi belgi — qajetti lıtsenzııalar men uıym týraly ashyq aqparattyń bolmaýy. Besinshisi, tolyqqandy kelisimsharttyń bolmaýy. Aqsha eshqandaı qujatsyz qabyldanýy nemese kompanııanyń naqty mindettemesi, qarajatty qaıtarý sharty men taraptyń jaýapkershiligi kórsetilmegen kelisimge qol qoıýdy usynýy múmkin.

Altynshy qaýipti belgi — aqsha qabyldaý tásilderiniń ashyq bolmaýy. Áleýetti salymshylarǵa qarajatty jeke tulǵalardyń bank shottaryna aýdarý, qolma-qol berý nemese operatsııanyń zańdylyǵyn rastaıtyn qujattarsyz krıptovalıýta túrinde jiberý usynylady.

Dılar Kýgabaev qarjy pıramıdasynyń qyzmetine tap bolǵan azamattardan quqyq qorǵaý organdaryna dereý habarlasýdy surady. Almaty qalasyndaǵy departamenttiń mekenjaıy: Jibek joly dańǵyly, 127. Senim telefony: 279-29-56.

Eske salaıyq, elordada paıyzsyz nesıe usynyp, 562 mln teńge paıda tapqan qarjy pıramıdasynyń isi sotqa joldandy.