Almatyda qarjy men ekonomıka basqarmalary birigip, 4 basqarmanyń ataýy ózgerdi

ALMATY. KAZINFORM — Almatyda qalalyq máslıhattyń kezekten tys HHHІI sessııasy ótti.

Sessııa barysynda Almaty qalasyn basqarý shemasyn bekitý máselesi talqylandy. Almaty ákimi apparatynyń basshysy Erlan Isabekov qala basshylyǵyna qarasty 8 aýdan ákimdigi men 24 basqarma bar ekenin atap ótti. Ol Úkimet bekitken bazalyq qurylymǵa sáıkestendirý jáne basqarma ataýlary túsinikti ári jeńil bolý maqsatynda 4 basqarmanyń ataýyn ózgertýdi usyndy:

* Qoǵamdyq damý basqarmasy — ishki saıasat basqarmasy bolyp qaıta ózgeredi;
* Qalalyq josparlaý jáne ýrbanıstıka basqarmasy — sáýlet jáne qala qurylysy basqarmasy bolyp ózgeredi;
* Seısmıkalyq qaýipsizdik jáne mobılızatsııalyq daıyndyq basqarmasy — mobılızatsııalyq daıyndyq, aýmaqtyq jáne azamattyq qorǵanys basqarmasy bolyp qaıta qurylady;
* Kommýnaldyq ınfraqurylymdy damytý basqarmasy — kommýnaldyq ınfraqurylym jáne turǵyn úı ınspektsııasy basqarmasy bolyp atalady.

Sonymen qatar ekonomıka basqarmasy men qarjy basqarmasy biriktirilip, ekonomıka jáne qarjy basqarmasy qurylady. Odan bólek qalalyq mobıldilik basqarmasyn eki derbes vedomstvoǵa bólinedi:

— jol qozǵalysyn uıymdastyrý jáne jolaýshylar kóligi basqarmasy;
— jol ınfraqurylymyn damytý basqarmasy.

Qala ákimdiginiń bul usynysy máslıhat depýtattary arasynda qoldaý tapty.

Eske salaıyq, byltyr Almaty ákimdiginde eki jańa basqarma quryldy. Olar — seısmıkalyq qaýipsizdik jáne jumyldyrý daıyndyǵy basqarmasy jáne qoǵamdyq keńistikterdi damytý basqarmasy.