Almatyda qaryzy bar turǵyndarǵa ystyq sý berý toqtatylyp jatyr
ALMATY. KAZINFORM – Almatyda kommýnaldyq qyzmet jylý energııasy úshin tólemegen tutynýshylardan bereshekti sot arqyly óndirip alýdy, sondaı-aq qaryz tolyq ótelgenge deıin páterlerde ystyq sý berýdi shekteýdi josparlap otyr. Bul týraly «Almaty jylý júıesi» JShS baspasóz qyzmetiniń ókilderi habarlady.
Kompanııanyń málimetinshe, birneshe márte eskertý jasalǵanyna qaramastan, keıbir tutynýshylar qyzmet kórsetýshi uıymnyń zańdy talaptaryn oryndamaı otyr. Qazirgi tańda kún saıyn ondaǵan boryshkerge ystyq sý berý toqtatylyp jatyr.
– Ystyq sý berýdi shekteý – májbúrli shara. Kásiporyn mundaı qadamǵa barýǵa májbúr. Óıtkeni jylý qyzmetteri úshin tólemderdiń ýaqytynda túspeýi aldaǵy jylytý maýsymyna daıyndyq pen júıeniń turaqty jumysyna kesirin tıgizedi, - delingen habarlamada.
2026 jyldyń basynan beri Almatyda tólem jasamaǵan 623 abonentke ystyq sý berý toqtatyldy. 2 204 boryshkerge qatysty sotqa talap-aryz berildi. 256 tutynýshynyń múlkine tyıym salyndy, 287 bank shoty buǵattaldy. 158 azamattyń elden shyǵýyna shekteý engizildi. Sonymen qatar bereshek somasy boryshkerlerdiń jalaqysynan jáne ózge de tabys kózderinen óndirilip jatyr.
Aıta keteıik, sot sheshimderi men atqarýshylyq jazbalar negizinde qaryzdy óndirip alý barysynda boryshkerdiń jyljymaly jáne jyljymaıtyn múlkine, avtokóligine, bank shotyna shekteý qoıylady. Sondaı-aq elden shyǵýyna tyıym salynyp, qyzmet túrlerine berilgen lıtsenzııalardyń qoldanylýy da toqtatylýy múmkin.
Mundaı sharalar tek uzaq ýaqyt boıy tólem jasamaǵan azamattarǵa qatysty qoldanylady. Ystyq sýdy shekteý nemese sotqa júginý aldynda kompanııa ókilderi bereshek týraly aldyn ala habarlap, túsindirý jumystaryn júrgizedi.
Eske salaıyq, buǵan deıin Almatyda kommýnaldyq qyzmetterdi rásimdeý tártibi jeńildetiletinin jazǵanbyz.
