Almatyda qaryz alýshylardan 3-5 ese artyq aqsha alǵan mıkroqarjy uıymdary anyqtaldy
ALMATY. KAZINFORM — Almatydaǵy ekonomıkalyq tergeý departamenti komıssııalyq dúkender, avtokólik jaldaý qyzmetteri jáne onlaın-platformalar arqyly jumys istegen jasyryn mıkronesıelik júıeni anyqtady.
Mekemeniń málimetinshe, qalada 14 zańdy jáne bir jeke tulǵaǵa qatysty qylmystyq is tirkelip, azamattarǵa keltirilgen shyǵyn tolyq ótelgen.
Departament basshysynyń orynbasary Sabyrǵalı Balǵalıevtiń aıtýyna qaraǵanda, qylmysty taldaý barysynda keıbir kompanııanyń klıenttermen «taýar satyp alý» shartyn jasasyp, is júzinde olardy kepil retinde paıdalanǵany, múlikti qaıta-qaıta satyp jiberip, jasyryn ústemaqy alǵany anyqtalǵan.
— Tergeý aıasynda alty mıkroqarjylyq uıymǵa, onyń ishinde Creditum jáne Sofi Finance uıymdaryna qatysty is sotqa joldandy. Qaryz alýshylar kepildik shart túrinde rásimdelgen mıkroqaryzdar úshin alǵan somadan 3-5 ese kóp tóleýge májbúr bolǵany is barysynda belgili boldy, — dedi Sabyrǵalı Balǵalıev Óńirlik kommýnıkatsııalar qyzmetinde ótken brıfıngte.
Shyǵyndy ótep, zańsyz qurylymdardyń jolyn kesý maqsatynda 42,6 mlrd teńgeniń múlkine shekteý qoıylyp, azamattardyń negizgi qaryzy boıynsha 1,6 mlrd teńge keshirildi. Almaty prokýratýrasy áleýmettik osal sanattaǵy 60 myńnan astam azamattyń quqyǵyn qorǵaý úshin sotqa talap aryz bergen.
Budan bólek, 7PAYda.kz saıty arqyly 7 myńnan astam adamǵa 10 mlrd teńgeden asatyn zańsyz qaryz bergen Aiken Tech JShS-niń qyzmeti toqtatyldy. Sonymen birge Comfort Time JShS-niń jalǵan zeınetaqy aýdarymyn paıdalanyp, 400 mln teńgeden asatyn 140 qaıtarymsyz kredıt alýǵa múmkindik bergen shema da anyqtaldy.
Eske salaıyq, buǵan deıin Qazaqstan halqy mıkroqarjy uıymdaryna 2,9 trln teńge nesıe qaryz ekenin jazǵanbyz.