Almatyda qarııany urǵan jasóspirimder qylmystyq jaýaptan bosatyldy

Almatyda qarııany soqqyǵa jyqqan jasóspirim men onyń dosyna qatysty qylmystyq is qaraldy, dep habarlaıdy QazAqparat tilshisi.

Almaty qalasynyń kámeletke tolmaǵandar isteri jónindegi mamandandyrylǵan aýdanaralyq sotynda aldyn ala sóz baılasý arqyly adamdar tobymen buzaqylyq jasaý faktisi boıynsha azamattar J. jáne A.-ǵa qatysty qylmystyq is qaraldy (QK 293-baby 2-bóliginiń 1-tarmaqshasy).

Sottyń málimetinshe, bıyl shilde aıynda eki jasóspirim kóshede kele jatyp, mas kúıinde jatqan azamat Ş.-ny baıqap, ony aıaǵynan aqyryn ıterip oıata bastaǵan. Buǵan jaýap retinde kámeletke tolmaǵandar Ş.-dan balaǵat sózder estigen.

«Kámeletke tolmaǵandardyń biri estigenine tózgisi kelmeı, óziniń artyqshylyǵyn kórsetkisi kelip, jábirlenýshiniń betinen birneshe ret soqqan.

Ekinshi aıyptalýshy oqıǵany smartfonyna túsirip, J.-ny jábirlenýshige dene jaraqatyn salýǵa baǵyttalǵan áreketterdi jasaýǵa ıtermelegen, keleke qylyp, mysqyl sózder aıtqan», - delingen málimette.

Osydan soń túsirilgen vıdeony Instagram áleýmettik jelisine salǵan.

Sarapshynyń qorytyndysy boıynsha jábirlenýshi Ş.-nyń densaýlyǵyna jeńil zııan keltirilgen. Sotta jasóspirimder óz kinásin tolyq moıyndap, jasaǵan isterine ókinip, jábirlenýshiden keshirim surady. Olardyń ata-analary jábirlenýshige keltirilgen materıaldyq jáne moraldyq zııandy ótedi. Óz kezeginde Ş. aıyptalýshylarmen tatýlasqanyn aıtyp, olarǵa eshqandaı shaǵymy joq ekenin, osyǵan baılanysty olardy qylmystyq jaýapkershilikten bosatýdy surady.

"Ol kámeletke tolmaǵandardy keshirdi, sebebi, olardyń zańdy ókilderi oǵan keltirilgen materıaldyq jáne moraldyq zııandy ótedi. Osyǵan baılanysty sot QK 68-babynyń 1-bóligi negizinde kámeletke tolmaǵan sottalýshylardy qylmystyq jaýapkershilikten bosatty, is boıynsha is júrgizýdi toqtatty. Sot sheshimi zańdy kúshine endi", - dep habarlady Almaty qalalyq sotynyń baspasóz qyzmetinen.

Eske salsaq, jazda Almatyda 16 jastaǵy jasóspirim qart adamdy judyryqpen uryp jibergen edi.