Almatyda «Qarǵaly» sý súzgileý stantsııasy 1 maýsymda iske qosylady

ALMATY. KAZINFORM – Naýryzbaı aýdanynyń ákimi Nazıra Toǵyzbaev aýdan turǵyndarymen kezdesýinde «Qarǵaly» sý súzgileý stantsııasy jazdyń alǵashqy kúni iske qosylatynyn habarlady.

Aýdan ákiminiń aıtýynsha, «Qarǵaly» sý súzgileý stantsııasynyń qurylys jumystary 2020 jyly bastalyp, 2023 jyldyń jeltoqsan aıynda aıaqtalǵan. Qazir stantsııa aýmaǵynda abattandyrý jáne iske qosý-jóndeý jumystary júrgizilip jatyr.

- «Qarǵaly» stantsııasynyń qurylysy 2020 jyldyń naýryz aıynda bastaldy. Ótken jyldyń jeltoqsan aıynda negizi qurylys jumystary bitti. Qurylys-montaj jumystaryna bólingen 6,8 mlrd teńgeniń 5,9 mlrd teńgesi ıgerildi. Osy jyldyń sáýir aıynda «Spetskommýnstroı» JShS-men quny 641 mln teńge bolatyn iske qosý-jóndeý jumystaryna kelisim jasaldy. Bıyl mamyr aıynyń sońyna deıin abattandyrý jumystaryn aıaqtap, 1 maýsym kúni stantsııany iske qosý josparlanǵan, – dedi Naýryzbaı aýdanynyń ákimi Nazıra Toǵyzbaev.

Aıta keteıik, «Qarǵaly» sý súzgileý stantsııasynyń iske qosylýy Naýryzbaı aýdanynyń quramyndaǵy Qaraǵaıly, Qarǵaly, Taýsamaly jáne Quramys yqsham aýdandarynda turatyn 50 myń turǵyndy sapaly sýmen qamtamasyz etýge múmkindik beredi.