Almatyda Qarǵaly ózenin lastaǵandar izdestirilip jatyr
ALMATY. KAZINFORM — Búgin Jandosov kóshesi men Abaı dańǵylynyń arasyndaǵy aýmaqta Qarǵaly ózenindegi sýdyń túsi ózgergeni baıqaldy. Bul týraly Almaty qalasy ákimdiginiń baspasóz qyzmeti habarlady.
Aldyn ala málimetke súıensek, kópirden ózenge jasyl tústi hımııalyq zat tógilgen bolýy yqtımal.
Almaty qalasynyń Ekologııa jáne qorshaǵan ortany qorǵaý basqarmasynyń mamandary oqıǵa ornyn tekserip shyqty. Zattyń quramyn anyqtap, ózenniń qanshalyqty lastanǵanyn bilý úshin Ekologııa departamenti men Sanıtarııalyq-epıdemıologııalyq baqylaý departamentiniń mamandary sý synamasvn alyp, zerthanaǵa jiberdi.
— 2025 jyly 5 tamyz kúni Almaty qalasynyń Ekologııa basqarmasy, Naýryzbaı aýdany ákimdigi, Ekologııa departamenti, Sanıtarııalyq-epıdemıologııalyq baqylaý departamenti jáne Balqash-Alakól basseındik ınspektsııasy birlesip, bul jaǵdaıdyń sebebin jáne kináli tulǵalardy anyqtaý boıynsha jumystar júrgizbek, — delingen ákimdik habarlamasynda.
Qazirgi tańda ózen arnasyndaǵy sý tabıǵı arnasymen aǵyp jatyr, lastaný men túsiniń ózgerý belgileri joq.
Aıta ketelik Almatydaǵy Qarǵaly ózeniniń arnasy 2026 jylǵa deıin qaıta jóndeletini týraly jazǵan edik.