Almatyda kardıohırýrgtar Mysyr azamatynyń ómirin saqtap qaldy

ALMATY. KAZINFORM - Qalalyq kardıohırýrgııalyq ortalyǵynda jiti koronarlyq sındrommen jáne koronarlyq arterııalardyń synı zaqymdanýymen túsken mysyrlyqtyń ómirin qutqarý boıynsha kúrdeli ota sátti ótti.

Qoǵamdyq densaýlyq saqtaý basqarmasynyń habarlaýynsha, dárigerler tobynyń úılesimdi jumysynyń arqasynda naýqasqa ýaqytyly kómek kórsetilgen. Mysyr azamaty klınıkaǵa keýde qýysynyń qatty aýyrýy jáne entigý shaǵymdarymen tústi.

Shuǵyl dıagnostıkalyq sharalardan keıin úsh koronarlyq arterııanyń synı zaqymdanýy anyqtalǵan. Bul ólimge ákelýi múmkin bolǵandyqtan, naýqasqa dereý hırýrgııalyq ota jasalǵan. Otany kardıohırýrgııa bólimshesiniń meńgerýshisi Nurjan Músirepov jasady.

- Naýqas júrek-ókpe fýnktsııasyn ýaqytsha aýystyrýǵa múmkindik beretin jasandy qan aınalymyn júrgizetin apparatyna qosyldy. Bul júrekke qajetti barlyq manıpýlıatsııany oryndaýdyń maksımaldy dáldigi men qaýipsizdigin qamtamasyz etti. Qazir naýqas fızıkalyq jaǵdaıdy qalpyna keltirý boıynsha keshendi sharalardy, arnaıy dıetany jáne dári-dármekpen emdeýdi qamtıtyn ońaltýdan sátti ótip jatyr. Ota MÁMS sheńberinde júrgizildi, sebebi patsıent Qazaqstanda turady, turýǵa yqtııarhaty bar jáne medıtsınalyq saqtandyrý boıynsha tólemdi únemi júrgizedi, - dep habarlaıdy basqaramanyń baspasóz qyzmetinen.