Almatyda qaraýsyz qalǵan aýrýhana qashan jóndeledi
ALMATY. KAZINFORM - Abaı men Masanshy kósheleriniń qıylysynda burynǵy temir jol aýrýhanasy ornalasqan. Kóp jyldar qaraýsyz qalǵan ǵımarattyń búgingi jaǵdaıy nashar. Ǵımarattyń qabyrǵasy kógerip, esik-terezesi synǵan.
Almaty qalasynyń ákimi Erbolat Dosaev 2023 jyldyń tamyz aıynda burynǵy temirjol aýrýhanasynyń ǵımaratynda balalardy ońaltýdyń qalalyq ortalyǵy ashylatynyn aıtty.
- Bul joba boıynsha “Qazrestavratsııadan” kelisim alýǵa biraz ýaqyt ketti. Bizdiń jobamyz maquldanyp, búginde jobalyq-smetalyq qujattama ázirlenýde. Kelesi jyly jumystar bastalady. Jobaǵa qarajat bólindi. Ol jerde rasymen balalarǵa arnalǵan qalalyq ońaltý ortalyǵy ashylady. Barlyq jumystar Almaty qalasynyń damý josparyna sáıkes júredi. Nysannyń tarıhı kelbetin qalpyna keltirýdi ózim qadaǵalaımyn. Al ortalyqtyń ishin zamanaýı jabdyqtarmen jabdyqtap, balalarǵa qolaıly jaǵdaı jasaımyz», - dep atap ótti Erbolat Dosaev.
Qala basshysynyń sózinen keıin ǵımarat aýmaǵy qorshalyp, nysan pasporty ilingen bolatyn. Pasport boıynsha jóndeý jumystary 2024 jyldyń mamyrynda bastalyp, 2025 jyldyń jeltoqsan aıynda aıaqtalýy qajet.
Alaıda belgilengen merzimnen 1 aı ótse de, qurylys jumystary bastalmady. Osyǵan oraı, aýrýhana aýmaǵyn tekserip kórgen Kazinform tilshisi ǵımarat shatyrynda memlekettik týdyń qulap jatqanyn jáne qorshaýdyń keı tustary buzylǵanyn anyqtady.
Jóndeý jumystarynyń ýaqtyly bastalmaýyna baılanysty Almaty ákimdigine saýal joldadyq. Ákimdiktiń baspasóz qyzmeti qazirgi ýaqytta jobalaý-smetalyq qujattamany ázirleý aıaqtalmaǵanyn habarlady.
- Qazirgi tańda jobalaý-smetalyq qujattamany ázirleýdiń 90%-y aıaqtaldy. Medıtsınalyq qural jabdyqtar boıynsha qabyldanǵan sheshimder tıisti memlekettik uıymdarmen kelisilip jatyr. Odan ári qaraı ázirlengen jobalaý smetalyq qujattama Memlekettik saraptamadan ótedi. Qurylys jumystaryn bastaý 2024 jyldyń qazan aıyna josparlanǵan, - delingen qala ákimdiginiń jaýabynda.
Aıta keteıik, redaktsııa tarapynan joldanǵan saýaldan keıin ǵımarat shatyryndaǵy memlekettik týdy ákimdik qyzmetkerleri alyp tastady.
Eske salaıyq, buǵan deıin Almatyda úısiz adamdardyń azaıǵany týraly jazyp, onda burynǵy temir jol aýrýhanasynyń ishin kórsetken edik.
