Almatyda Qarasý jaǵalaýy qalaı abattandyrylady
ALMATY. KAZINFORM – Bıyl Qarasý ózeniniń jaǵalaýy abattandyrylady. Almaty ákimi Erbolat Dosaevtyń Jetisý aýdanynyń turǵyndarymen kezdesý barysynda jobanyń eskızderi usynyldy.
Erbolat Dosaev Jetisý aýdanynda eki jańa saıabaq aımaǵy paıda bolatynyn atap ótti.
– 2025 jyldyń maýsym aıynda Kemel shaǵyn aýdanynda 12 ga jaǵalaýdy abattandyrý jumystary bastalady, qyrkúıek aıynda Aınabulaq shaǵyn aýdanynda 10 ga saıabaq aımaǵyn abattandyrý jobasy qolǵa alynady, – dedi Erbolat Dosaev.
Aıta keteıik, 2024 jyly Jetisý aýdanynda Esentaı ózeni boıynsha Kókmaısa, Kókjıek shaǵyn aýdandarynda jáne Kedrovaıa kóshesinde jalpy aýdany 24,6 ga 3 jańa saıabaq-jaǵalaý aımaǵy salynady.
Sonymen qatar, Almaty ákimi «Halyq qatysatyn bıýdjet» baǵdarlamasyn iske asyrý boıynsha josparlaryn aıtty. Bıyl 30 joba júzege asyrylady. Bul - 22 qoǵamdyq keńistikti, 4 aýla aýmaǵyn jáne 4 basqa ınfraqurylym nysandaryn abattandyrý.
– Bıyl «Halyq qatysatyn bıýdjet» aıasynda 1200-den astam usynystyń ishinen 30 joba irikteldi. Osy baǵdarlama boıynsha bizdiń qalamyzda eń kóp ótinim Jetisý aýdanynyń turǵyndarynan túskenin erekshe atap ótkim keledi. Bul úshin shyn júrekten alǵys aıtamyn, – dedi ákim.
Úsh jyl ishinde Almatyda HQB baǵdarlamasy aıasynda 39,1 mlrd teńge somasyna 938 joba iske asyryldy.
2025 jyly osy maqsattarǵa 17,1 mlrd teńge bólindi.
Eske salaıyq, byltyr Esentaı ózeni arqyly ótetin kólik kópiri apatty dep tanylyp, ornyna jańasy salynǵan bolatyn.