Almatyda Qarasý kóliniń tabany tazartyldy

ALMATY. KAZINFORM – Almatydaǵy Qarasý kóliniń túbi qoqys pen laı shógindilerden mehanıkalyq túrde tazartyldy.

Almaty ákimdiginen málim etkendeı, mehanıkalyq tazalaý jumysyn «TOLAGAI-2050» seriktestigi júrgizdi. Jobaǵa sáıkes, atalǵan jumystar 2023 jyldyń naýryz aıynda bastap, qyrkúıekte aıaqtaýǵa tıis edi. Alaıda aıaqtalý merzimi osy jylǵa aýystyryldy, sebebi túbindegi laıdyń qalyńdyǵy jobalaý kezinde boljanǵannan birneshe ese kóp bolyp shyqty (30 sm ornyna 100-120 sm).

Sonymen qatar, aýyr tehnıkanyń ótýi úshin kóldiń túbinen ýaqytsha jol salý qajettiligi de merzimge áser etti.

«Bastapqyda tazartý jumystaryn topyraq qatqan qys mezgilinde júrgizý josparlanǵan edi. Kóldi tazartý jumystary aıaqtalǵan soń ýaqytsha jol laımen birge shyǵaryldy. Aıta ketý kerek, bul jumys toǵan tarıhynda alǵash ret júrgizildi. Sonyń nátıjesinde kóldiń túbinen 53 tonna qoqys jáne 10 myń tekshe metr laı shógindisi shyǵaryldy. Sonymen qatar, sý deńgeıin retteý jáne onyń jaǵaǵa asyp ketýin boldyrmaý úshin sý aǵyzý qurylystary salyndy»,- dep atap ótti ákimdikten.

Joba qalalyqtardyń shaǵymdanǵan birneshe máselesin sheshýge múmkindik beredi: birinshi kezekte, tazartý arqyly sý aıdynynyń ekologııalyq tepe-teńdigi men bıologııalyq alýan túrliligi qalpyna keledi. Kól turǵyndar men qala qonaqtary úshin qaıtadan demalýǵa yńǵaıly orynǵa aınalady.

Qarasý shaǵyn aýdanynyń turǵyndary kóldi tazartý jumystary úshin alǵys bildirip, ákimnen sý qoımasy mańynda jaıaý júrginshiler aımaǵyn salýdy ótindi.

Almaty ákimi Erbolat Dosaev óziniń tapsyrmasymen sportpen shuǵyldanýǵa arnalǵan serýendeý jáne belsendi demalys aımaqtaryn salýdy qamtıtyn kóriktendirý jobasy ázirlenetinin aıtty.

Eske salaıyq, Qarasý kólin tazartý jumystary byltyr bastalǵan edi. 

Osyǵan deıin Saıran kóliniń jaǵalaýyn abattandyrýǵa 4 mlrd teńge jumsalatyny týraly jazǵan bolatynbyz.