Almatyda Qarasaı kóshesiniń bir bóligi jańarǵan alleıaǵa aınalady

ALMATY. KAZINFORM – Qarasaı batyr kóshesi jaıaý júrginshilerdiń alleıasyna aınalady. 

Almaty ákimdiginiń málimetinshe, qazir Naýryzbaı batyr kóshesinen Abylaı han dańǵylyna deıin Qarasaı batyr kóshesiniń boıynda abattandyrý jumystary júrip jatyr. Qala ortalyǵynda ornalasqan kóshe jańa sıpatqa ıe bolyp, jaıly jáne kógaldandyrylǵan keńistikke aınalady.

– Joba «Halyq qatysatyn bıýdjet» baǵdarlamasy aıasynda qolǵa alyndy. Ol jaqyn mańdaǵy jańartylǵan Qaraǵaıly skverimen jalǵasqan. Bul eki keńistik birigip, qalanyń jasyl ınfraqurylymynyń ózara baılanystyratyn birtutas jaıaý júrginshiler men demalys aımaǵyn quraıdy, - dedi Almaly aýdanynyń ákimi Arman Shamshın.

Ákimdik málimetine sáıkes, bul aýmaqqa sońǵy ret jóndeý jumysy 2017 jyly júrgizilgen. Turǵyndardyń ótinishi negizinde munda 2025 jyldyń sáýirinde kúrdeli jóndeý jumysy bastalǵan. Qazir jumystyń 70 paıyzy aıaqtalǵan. Qalǵan jumystar shildeniń alǵashqy onkúndiginde aıaqtalady dep josparlanǵan. 

– Abattandyrýdyń jalpy aýmaǵy – 8 500 m². Onyń 8 200 m² jýyǵy kógaldandyryldy. Sonymen qatar 206 metr bordıýr men 1 947 metr porebrık ornatyldy. 18 jańa oryndyq pen jańa úlgidegi 28 sham ornatyldy. 3 200 m² eski jabyn alynyp tastalyp, 10 aǵash kesildi. Bul kósheniń tabıǵı kelbetin saqtap qana qoımaı, onyń ekologııasyn jaqsartýǵa da sep bolmaq, - dedi aýdan ákimi.

Eske salaıyq, buǵan deıin Almatyda Prezıdent rezıdentsııasynyń ornyndaǵy saıabaq qurylysyna 2,2 mlrd teńge jumsalatynyn jazǵanbyz.