Almatyda qar tazalaý jumystary qalaı júrip jatyr
ALMATY. KAZINFORM — Almatynyń kommýnaldyq qyzmeti kúsheıtilgen rejımde jumys istep jatyr.
22-23 qańtarda Almaty qalasynda jaýǵan qardyń qalyńdyǵy 18 sm-ge jetti.
Qar kúreý jumystary qala kóshelerinde táýlik boıy júrgizilip jatyr. Oǵan júzdegen tehnıka men 1280 jumysshy tartyldy.
Túngi ýaqytta qardy shyǵarý úshin 161 júk kóligi jumyldyryldy. 24 myń tekshe metr qar shyǵaryldy. Qaýipsiz qozǵalysty qamtamasyz etý jáne joldardy tazartý maqsatynda 442 arnaıy tehnıka joldardy tazalaýǵa kiristi.
Sonymen qatar, trotýarlardy, qoǵamdyq oryndardy, qoǵamdyq kólik aıaldamalary men jerústi ótkelderin mehanıkalandyrylǵan tazalaý jumystary qolǵa alyndy.
Búgin kúndizgi ýaqytta 448 tehnıka men 1192 jumysshy shyǵady.
«Qazgıdromet» RMK boljamynsha 24 qańtarda kún alabultty, jaýyn-shashyn kútilmeıdi. Kúndizgi aýa temperatýrasy -10…-12°S shamasynda bolady.
Osyǵan deıin elimizdiń barlyq óńirinde aýa raıyna baılanysty eskertý jasaldy.