Almatyda qar tazalaý jumystary qalaı júrip jatyr
ALMATY. KAZINFORM – Almatyny qalyń qar basyp, kommýnaldyq qyzmet biraz ábigerge tústi. Qar tazalaýǵa 600 tehnıka men myńnan asa jumysshy jumyldyrylǵan.

Almaty ákimdiginiń málimetinshe, 20 jeltoqsan saǵat 8:00-de jaýa bastaǵan qar saǵat 22:00-de toqtady. Saǵat 21:30-ǵy jaǵdaı boıynsha qalada qardyń qalyńdyǵy 12 sm-ge, al taýly aımaqtarda 18 sm-ge jetti.

– Qala jáne taý bókterindegi aýdandardyń joldaryna muzǵa qarsy materıaldar sebildi. Buǵan 2450 tonna materıal jumsalyp, birinshi kezeń saǵat 16:30-da aıaqtaldy. Kún batqan soń temperatýranyń 0°C-tan -4°C-qa deıin kúrt tómendeýi jáne qardyń qatýy jolda muzdyń paıda bolýyna ákeldi. Osyǵan baılanysty saǵat 17:30-dan bastap qaıtalama óńdeý júrgizildi. 22:00-de jol boıyn tazalap, muzǵa qarsy reagentter sebý jumystary bastaldy. Barlyq shara qala kóshelerindegi qozǵalys qaýipsizdigin qamtamasyz etý úshin úzdiksiz jalǵasyp jatyr, – dep habarlady ákimdikten.
Túngi ýaqytta qardy tazalaýǵa 21 tehnıka jumyldyryldy.

16 jeltoqsannan beri 46 myń tekshe metrden astam qar shyǵaryldy.
«Qazgıdromet» RMK boljamynsha, 21 jeltoqsanda túnde kóshpeli bult shyǵyp, azdaǵan qar jaýady. Túnde aýa temperatýrasy -8…-10°C. Kúndiz -4 -6°C bolady.
Osyǵan deıin áýejaıda reıster keshigip, kóshelerde keptelis paıda bolǵany týraly jazǵan edik.