Almatyda qar borap tur: tazalaý jumystaryna 600 tehnıka jumyldyryldy
ALMATY. KAZINFORM – Almatyda kommýnaldyq qyzmet kóshe qaryn kúreýge kiristi.
Almaty ákiminiń orynbasary Beıbit Shahanovtyń aıtýynsha, qalanyń kommýnaldyq qyzmeti kóshelerdi, joldar men trotýarlardy qardan tazalaýǵa kiristi. Qar kúreý jumystary táýlik boıy júrgiziledi.
– Búgin saǵat 9:00-de qalada jáne taýly aýdandarda qar jaýa bastady. Qar eki táýlik jaýady degen boljam bar. Tańerteńnen bastap kommýnaldyq qyzmet kóshelerge kóktaıǵaqqa qarsy arnaıy qospalar seýip, qozǵalys qaýipsizdigin qamtamasyz etti. Negizgi jumys qar kúrelgen soń bastalady. Biz magıstraldy jáne ortalyq kóshelerge qardy úıgen soń ony shyǵarýǵa kirisemiz, – dedi Almaty ákiminiń orynbasary.
Qazgıdromettiń málimetinshe, 23-24 qańtarda Almatyda aýa temperatýrasy -15…-20 gradýsqa deıin tómendeıdi. Qazir joldarǵa kóktaıǵaqqa qarsy materıaldar sebilip jatyr. 950 tonna kóktaıǵaqqa qarsy materıaldar jáne 60 m³ suıyq reagentter paıdalanyldy. Qaýipti jol ýchaskelerinde joldyń jaǵdaıyn baqylap otyratyn 46 jedel top jumys istep jatyr.
Magıstraldy kóshelerdi qardan tolyq tazalaý jumysy 3 kúnge, aýdandyq mańyzy bar kóshelerdi tazalaý 7 kúnge sozylady.
– Qazir joldarda 600-den astam arnaıy tehnıka jumys istep jatyr, kúndizgi ýaqytta shamamen 1,5 myń adam jumyldyryldy. Jumys túnde de jalǵasady, qar tolyq shyǵarylǵanǵa deıin toqtatylmaıdy. Tazalyqty baqylaý úshin aýdan ákimdikterinde táýlik boıy kezekshilik uıymdastyryldy, – dedi Beıbit Shahanov.
Qala ákiminiń orynbasary, kommýnaldyq qyzmettiń jumysyna túsinistikpen qarap, kómektesýdi surady.
– Arnaıy tehnıkanyń jumysyn qıyndatpaý úshin kólikterdi jol jıekterine qoımaýlaryńyzdy ótinemiz, – dedi ákimniń orynbasary.
23 qańtarda qar jaýady, túnde temperatýra -13…-15°C, kúndiz -7…-9°C. 24 qańtar kúni kóshpeli bult shyǵady, jaýyn-shashynsyz. Túnde -18…-20°C, kúndiz -10…-12°C.
Osyǵan deıin Qazgıdromet Qazaqstanda 40 gradýs aıaz bolatynyn málimdedi.
Eske sala keteıik, buǵan deıin 5 oblysta aýa raıynyń qolaısyzdyǵyna baılanysty mektep oqýshylary onlaın oqytýǵa kóshkenin habarlaǵan edik.