Eldiń energo ortalyqtary kómir jáne mazýtpen qamtamasyz etilgen
ALMATY. KAZINFORM – Ortalyq kommýnıkatsııaar qyzmeti alańynda Energetıka mınıstrliginiń Memlekettik energetıkalyq baqylaý jáne qadaǵalaý komıteti tóraǵasynyń orynbasary Ilıa Rojkov BAQ ókilderine 2025–2026 jyldardaǵy jylytý maýsymynyń ótý barysy jáne halyq pen áleýmettik nysandardy qajetti otynmen qamtamasyz etý sharalary týraly málimet berdi.
Jylytý maýsymy turaqty ótip jatyr. Bıylǵy jóndeý naýqany aıasynda elektr stantsııalarynda 10 energoblokty, 63 qazandy jáne 39 týrbınany jóndeý josparlanǵan. Búgingi tańda 9 energoblokta, 56 qazanda jáne 37 týrbınada jóndeý jumystary tolyq aıaqtaldy. Oǵan qosa, 17 myń km elektr jelileri men 420 qosalqy stantsııada jóndeý júrgizildi.
Barlyq is-shara bekitilgen kestelerge sáıkes oryndalyp jatyr. Energetıkalyq qadaǵalaý jáne baqylaý komıtetiniń aýmaqtyq departamentteri apta saıyn energetıkalyq kásiporyndarǵa baryp, jylytý maýsymynyń ótý barysyn jergilikti jerde baqylap otyrady.
Bıyl elektr stantsııalaryndaǵy jóndeý naýqanyna 396 mlrd teńge qarastyrylǵan, bul ótken jylmen salystyrǵanda 18%-ǵa kóp. Jylý jelileri boıynsha 323 km jylý magıstralinde jańǵyrtý jáne kúrdeli jóndeý júrgizildi.
— Energııa kózderindegi janarmaı qoımalarynda 5,6 mln tonna kómir jáne 148 myń tonna mazýt jınaldy, bul normatıvtik deńgeıge sáıkes keledi. Jyl saıyn ákimdikterdiń ótinimderi boıynsha Mınıstrlik óńirlerge arnalǵan «áleýmettik» mazýt jetkizý kestesin bekitedi. Bıylǵy jylytý maýsymyna 257 myń tonna kóleminde mazýt qarastyrylǵan, — delingen habarlamada.
Energetıka mınıstrligi oblys ákimdikterimen, «QTJ» jáne kómir óndirýshi kásiporyndarmen birlesip, óńirlerdi turǵyndar men kommýnaldyq-turmystyq sektor úshin kómirmen qamtamasyz etý máseleleri boıynsha Respýblıkalyq shtabtyń otyrystaryn turaqty ótkizip keledi.
Óńirlerdiń jylytý maýsymyna arnalǵan jalpy kómir qajettiligi 7,4 mln tonna. Búgingi tańda 6,4 mln tonna kómir daıyndaldy, bul jyldyq jospardyń 86%-y.
Aıta ketelik Energetıka mınıstrligi kómir boıynsha problema joq ekenin aıtqan edi.