Almatyda Qańtar kezinde kisi óltirgen áskerı 7 jylǵa sottaldy

ALMATY. KAZINFORM – Almaty garnızony áskerı sotynyń jabyq sot otyrysynda aýyr zardaptarǵa ákep soqtyrǵan qarýdy qoldana otyryp, bılikti asyra paıdalaný aıyby taǵylǵan Aıtjan Áýbákirovke qatysty qylmystyq is qaraldy.

Sot málimetine sáıkes, aıyptalýshy bıliktiń ókili bola otyryp, óziniń quqyqtary men ókilettikterinen tys áreketter jasaǵan. Áýbákirov is-áreketiniń nátıjesi eki jábirlenýshiniń ólimine alyp kelgen.

Sot barysynda memlekettik aıyptaýshy sottalýshyny 7 jylǵa bas bostandyǵynan aıyrýdy surady. Sottalýshy kinásin moıyndamady.

- Sottalýshynyń kinási saraptamalardyń qorytyndylarymen, kýágerlerdiń, sarapshylardyń aıǵaqtarymen, oqıǵa bolǵan jerdi qarap-tekserý hattamalarymen jáne zattaı dáleldemelermen dáleldendi. Sottalýshy 7 jylǵa bas bostandyǵynan aıyryldy. Ol áskerı ataǵynan aıyryldy jáne jábirlenýshiniń paıdasyna 20 mıllıon teńge moraldyq zalal óndirildi, - dep habarlady sottan.

Sot úkimi zańdy kúshine engen joq.

Eske salaıyq, buǵan deıin Qańtarda 4 jasar Aıkórkemdi atty dep aıyptalǵan áskerı 7 jylǵa sottalǵanyn jazǵanbyz.