Almatyda «qansyraǵan júrektiń sabaǵy» atty erekshe gúl ósedi
Almaty botanıkalyq baǵynda «baqyt aǵashy», «taǵdyr aǵashy», «taza mahabbat», «mahabbat sımvoly» nemese «qansyraǵan júrektiń sabaǵy» atanǵan gúl ósedi. Ósimdiktiń gúldený kezinde erekshe ádemi bolýyna baılanysty joǵarydaǵy esimder berilgen. Bul týraly Almaty qalalyq botanıkalyq baqtyń baspasóz qyzmeti málim etti, dep habarlaıdy QazAqparat tilshisi.
Botanıkalyq baqtyń málimetinshe, ósimdik gúldený kezinde erekshe ádemi bolýyna baılanysty birden birneshe ataýǵa ıe bolǵan.
Ósimdiktiń ǵylymı ataýy — Tompson Klerodendrýmy.
Sebebi, shotlandııalyq Djordj Tompson esimdi azamat gúldi alǵash ret Afrıkadan Eýropaǵa ákelgen. Sol úshin onyń esimi gúlge berilgen.
«Tompson Klerodendrýmy (lat. Clerodendrum thomsoniae) — Lamiaceae tuqymdasyna jatatyn lıana tárizdi kópjyldyq tropıkalyq ósimdik. Tabıǵı jaǵdaıda aǵash butaqtarynyń uzyndyǵy 4 metrden asýy múmkin. Páter ishinde sırek jaǵdaıda úlken kólemge jetedi. Japyraqtary sopaq, úshkir, uzyndyǵy shamamen 10 sm jetedi. Ereksheligi — aıqyn tamyrlarynyń bolýy. Sabaqtarynyń ushynda kúshti gúl shoqtary bolady, olardyń árqaısysynda 10-nan 30-ǵa deıin gúl bolady», — dep habarlady botanıkalyq baqtyń baspasóz qyzmeti.
Ádette Tompson Klerodendrýmnyń gúldenýin birneshe aktidegi teatr qoıylymyna uqsatady. Sebebi, birinshi áppaq, móldir japyraqshalar paıda bolady.
Keıin ádemi qyzyl gúl japyraqtary ashylyp, keremet kóriniske qosymsha tyrnaqshalar ósip shyǵady.
Bul rette qyzyl jáne aq túster erekshe kórinedi. Uzaq gúldenýden soń gúlder birte-birte solyp, aqshyl sıren túske boıalady.
Gúldený kezeńi kóktemniń basynda bastalyp, kúzdiń sońyna deıin jalǵasady.
«Bizdiń botanıkalyq baqta Tompson Klerodendrýmy jylyjaı kesheninde ósedi. Esterińizge salsaq, biz jabyq ósimdikter jármeńkesin jalǵastyramyz, onda ártúrli ósimdikterdi satyp alyp, mamandardan olardy ósirý jáne kútim jasaý boıynsha aqyl-keńes ala alasyzdar», - dep atap ótti botanıkalyq baqtyń baspasóz qyzmeti.
