Almatyda qansha jasóspirim papılloma vırýsyna qarsy ekpe aldy

ALMATY. KAZINFORM – Almatyda 11 jastaǵy qyzdarǵa adam papılloma vırýsyna qarsy vaktsına salynyp jatyr. Bul týraly óńirlik kommýnıkatsııalar qyzmetinde ótken baspasóz máslıhatynda qalalyq Sanıtarlyq-epıdemıologııalyq baqylaý departamentiniń basshysy Qasymhan Alpysbaıuly aıtty.

«Qalada 11 jastaǵy 1 724 qyz vaktsınatsııalandy, al qosymsha ımmýndaý sheńberinde 12 jáne 13 jastaǵy 2 340 jasóspirim ekpe aldy. Vaktsınatsııa ata-analardyń tek jazbasha kelisimimen júzege asyrylady. Protsedýradan buryn ár balany qarsy kórsetkishterdi anyqtaý úshin dáriger tekseredi. Búginge deıin qyzdarda ekpiniń eshqandaı keri áseri baıqalǵan joq», - dedi spıker.

Aıtýynsha, vaktsınatsııany Almaty mektepterindegi kóshpeli medıtsınalyq brıgadalar júrgizip jatyr, olar 41 medıtsınalyq uıymǵa bekitilgen jáne 251 memlekettik jáne jekemenshik mektepti qamtıdy. 

«HPV-ge qarsy vaktsınatsııa Úkimettiń 2024 jylǵy aqpanda qabyldanǵan qaýlysyna sáıkes tegin medıtsınalyq kómektiń kepildendirilgen kólemine engizilgen. Baǵdarlama DDU, ıÝNISEF jáne QR Densaýlyq saqtaý mınıstrliginiń qoldaýymen respýblıkalyq bıýdjet qarajatyna iske asyrylýda», - dep atap ótti Qasymhan Alpysbaıuly. 

Osyǵan deıin elimizde 5 myńǵa jýyq jetkinshek APV-ǵa qarsy vaktsına alǵany týraly jazǵan edik. 

Sondaı-aq Qazaqstanda adam papılloma vırýsyna qarsy vaktsınanyń densaýlyqqa áseri zerttelip jatqany týraly jazǵan bolatynbyz. 

Densaýlyq saqtaý mınıstrliginiń dereginshe, jyl saıyn jatyr moıny obyryna 2 myń adam (áıel) shaldyǵady, onyń 600-ge jýyq qaıtys bolady.