Almatyda qansha turǵyn úı PIK-ten MIB-ke aýysty
ALMATY. KAZINFORM — Qazir Almatyda 9 myńnan astam kóppáterli turǵyn úı bar. Onyń 6 227-i basqarýdyń jańa formatyna aýysty. Bul týraly qalalyq ákimdiktiń Kazinform tilshisiniń saýalyna bergen jaýabynda aıtyldy.
Kommýnaldyq ınfraqurylymdy damytý basqarmasynyń málimetinshe, 1 555 kópqabatty úı páter ıeleri kooperatıvterinen múlik ıeleriniń birlestigine (MIB) jáne 4 672 úı jaı seriktestikke (JS) kóshken.
— Basqarýdyń jańa formasy «Múlik ıeleriniń birlestigi» kommertsııalyq emes uıymynyń jańa nysany «bir úı — bir birlestik — bir shot» qaǵıdaty boıynsha quryldy, ol árbir úıdi basqarýdyń jeke tásilin kózdeıdi, sondaı-aq turǵyndarǵa aqsha túsimi men onyń jumsalýyn monıtorıng jasaýǵa jáne tek óz úıin ustaýǵa qarajat jınaýǵa múmkindik beredi, — dep atap ótti basqarmadan.
MIB-ke nemese JK-ǵa qalaı aýysýǵa bolady?
«Turǵyn úı qatynastary týraly» zańǵa sáıkes, turǵyn úıdi basqarý nysanyn tańdaý týraly sheshim qabyldaý úshin turǵyndar kóppáterli turǵyn úıdiń páterleriniń, turǵyn emes úı-jaıdyń menshik ıeleriniń jınalysyn ótkizip, kondomınıým obektisin saılaýǵa mindetti.
Olar mynadaı formalar bolýy múmkin:
- Múlik ıeleriniń birlestigi — kóppáterli bir turǵyn úıdiń páterleriniń, turǵyn emes úı-jaıdyń menshik ıeleri qurǵan, kondomınıým obektisin basqarýdy júzege asyratyn, ony ustaýdy qarjylandyratyn jáne onyń saqtalýyn qamtamasyz etetin kommertsııalyq emes uıym bolyp tabylatyn zańdy tulǵa.
- Kóppáterli turǵyn úıdiń jaı seriktestigi — qyzmetin QR azamattyq zańnamasyna sáıkes jasalǵan birlesken qyzmet týraly shart negizinde júzege asyrady. Bul rette páterlerdiń, turǵyn emes úı-jaıdyń menshik ıeleri kondomınıým obektisin basqarý nysandaryn tańdaýda jáne ózgertýde erikti.
Sonymen qatar, kommýnaldyq qyzmet kórsetetin uıymdar tólem bolmaǵan, sondaı-aq, shartta belgilengen merzimde tolyq tólem bolmaǵan jaǵdaıda, qyzmetterdi tolyq nemese ishinara kórsetýdi toqtatady.
Sondaı-aq rommýnaldyq ınfraqurylymdy damytý basqarmasy turǵyn úıdi basqarý organdary óz mindetin durys atqarmaǵan jaǵdaıda qaıda júginýge bolatynyn túsindirdi.
— Eger basqarý organy óz mindetterin tıisti túrde oryndamaǵan jaǵdaıda turǵyndar basqarý organyna qatysty sharalar qabyldaý jáne tekserý júrgizý úshin, sondaı-aq tekserý paraǵynyń 13 tarmaǵy boıynsha buzýshylyqtar bolǵan jaǵdaıda Dostyq dańǵyly, 85 mekenjaıyndaǵy 5-qabat 504 kabınetke júgine alady, — delingen basqarma jaýabynda.
Buǵan deıin Memleket basshysy Qasym-Jomart Toqaev turǵyn úı-kommýnaldyq sharýashylyq reformasyn synǵa alǵan edi.
Keıin Májilistiń jalpy otyrysynda turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly zań jobasy qaraldy.
Májilis depýtaty Ekaterına Smyshlıaevanyń aıtýynsha, jańa zań jobasy eki negizgi máseleni sheshedi.
— reforma júrgizilgen 6 jyl ishinde ınstıtýt retinde joıylmaǵan páter ıeleri kooperatıvteri qyzmetiniń ashyqtyǵyna qoıylatyn talaptardy engizý;
— turǵyndardyń kondomınıýmdy basqarý nysandary men sharttaryn tańdaýy úshin barynsha erkin quqyqtyq orta qurý.
— Páter ıeleri kooperatıvteriniń basqarý sýbektisi retindegi qyzmetine jańa talaptar qoıylady.
— Atap aıtqanda, sýbektini qaıta tirkeý tártibi, quqyq belgileıtin qujattardy berý tártibi, sol sııaqty jumystyń ashyqtyǵyna qoıylatyn talaptar bar. Sol sııaqty menshik ıeleri birlestigi tóraǵasynyń ókilettik merzimi bir jyldan úsh jylǵa deıin ulǵaıady, menshik ıeleriniń birlestigine úıdi basqarý jónindegi qyzmetti óz erkimen júrgizýge quqyq beriledi jáne qurylys salýshynyń birinshi páterdi satqannan keıin kondomınıýmdy tirkeý mindettemesi kózdeledi, — deıdi Ekaterına Smyshlıaeva.
Eske sala ketsek, turǵyn úı-kommýnaldyq sharýashylyǵy ulttyq jobasyn ázirleý byltyr qolǵa alyndy.