Almatyda qansha seısmıkalyq stantsııa jumys istep tur
ALMATY. KAZINFORM — Almatyda joıqyn jer silkinisi týraly halyqty erte avtomatty túrde eskertý júıesin damytý jumystary jalǵasyp jatyr.
Almaty qalasynyń Jumyldyrý daıyndyǵy, aýmaqtyq jáne azamattyq qorǵanys basqarmasynyń málimetinshe, búginde 40 nysannyń barlyǵynyń ornalasýy aıqyndalyp, olardyń 35-inde seısmıkalyq stantsııalar salynǵan. Stantsııalardy ornalastyrý oryndary geologııalyq, geofızıkalyq jáne seısmıkalyq jaǵdaılar eskerile otyryp belgilengen. Sonymen qatar nysandardy turaqty jer paıdalaný quqyǵymen ornalastyrý úshin jer ýchaskelerin rásimdeý jumystary júrgizilip jatyr.
Jańa stantsııalar qoldanystaǵy seısmıkalyq baqylaý jelisine qosylady. Bul jer silkinisterin baqylaý aýqymyn keńeıtip, kúshti seısmıkalyq oqıǵalar týraly aqparatty jedel alýǵa múmkindik beredi.
Odan bólek 2025 jyldan beri jer silkinisin erte anyqtaýǵa arnalǵan 70 avtomattandyrylǵan stantsııany ornatý jumystary júrgizilip jatyr. Qazirgi ýaqytta Almaty qalasyn qorshaı ornalasqan Almaty oblysynyń aýmaǵynda 65 stantsııa salynǵan. Qalǵan 5 stantsııanyń qurylysy osy jyldyń sońyna deıin aıaqtalady dep josparlanyp otyr.
— Osydan keıin barlyq jańa stantsııa qoldanystaǵy erte avtomatty eskertý júıesiniń 28 stantsııasymen biriktiriledi, — dep habarlady vedomstvo.
Basqarma ókilderi qalada Almaty aglomeratsııasynyń seısmogeodınamıkalyq jaǵdaıyn zertteýge arnalǵan úsh jyldyq joba júzege asyrylyp jatqanyn da atap ótti. Joba aıasynda tektonıkalyq jarylymdardyń tsıfrlyq kartasy, seısmıkalyq model jáne geodınamıkalyq belsendi aımaqtardyń kartasy ázirlenip, jer betiniń yǵysýy men deformatsııasyna baǵalaý júrgiziledi.
Eske salaıyq, buǵan deıin 2025-2026 jyldary 70 seısmostantsııa ornatylatynyn jazǵanbyz.
