Almatyda qansha ata-ana sábıine týberkýlezge qarsy vaktsına salǵyzǵysy kelmeıdi

ALMATY. KAZINFORM – Balalardaǵy týberkýlezdiń aldyn alýdyń mańyzdy ádisteriniń biri - BTsJ vaktsınasyn egý. Bul týraly Almaty óńirlik kommýnıkatsııalar qyzmetiniń baspasóz máslıhaty barysynda qalalyq qoǵamdyq densaýlyq basqarmasy ftızıopýlmonologııa ortalyǵynyń dırektory Janar Sápıeva eske saldy.

«Byltyr BTsJ vaktsınatsııasymen jańa týǵan balalardyń 88,3% qamtyldy. Alaıda nárestelerdiń 11,7%-y vaktsına almady. Onyń 3,8%-y jeke senimi boıynsha egýden bas tartsa, 7,8 paıyzynda medıtsınalyq qarsy kórsetilimderi bolǵan», - deıdi spıker.

Emhanalar deńgeıinde balalardy vaktsınatsııalaý jumystary jalǵasyp jatyr. 2023 jyly medıtsına mekemelerinde 920 bala vaktsınatsııalandy, bul - egilmegen sábılerdiń jalpy sanynyń 3,8 paıyzy.

Mamannyń aıtýynsha, búkil álemde týberkýlez ınfektsııasynyń jasyryn túrin emdeý júrgiziledi. Alaıda, kóptegen ata-ana balalardaǵy jasyryn týberkýlez ınfektsııasyn profılaktıkalyq emdeýden bas tartady. Bul, ásirese týberkýlezben aýyratyn jáne aýrýdyń belsendi túriniń damý qaýpi joǵary balalarǵa qatysty.

«Profılaktıkalyq emdeý týberkýlezdiń keń taralǵan jáne aýyr túrleriniń damý qaýpin azaıtady. Dúnıejúzilik densaýlyq saqtaý uıymy týberkýlezdi profılaktıkalyq emdeý aýqymyn eń qaýipti popýlıatsııalar arasynda, sonyń ishinde kúndelikti ómirde týberkýlezben aýyratyn adamdarmen, AITV-ınfektsııasymen ómir súretin adamdarmen jáne ımmýnıteti tómendegen basqa adamdar arasynda arttyrýdy usynady», - dedi Janar Sápıeva.