Almatyda qansha aǵash pen buta bar jáne olardyń jaı-kúıin kim baqylaıdy
ALMATY. KAZINFORM – Almatyda 4,3 mıllıonnan astam jasyl jelek bar.
Muny Almatynyń ekologııa jáne qorshaǵan orta basqarmasy ókilderi Kazinform agenttigi resmı saýalyna bergen jaýabynda aıtty.
– 2018-2019 jyldary júrgizilgen túgendeý nátıjeleri men Almatynyń jasyl jelekter tizilimine engizilgen málimetter boıynsha, qala aýmaǵynda 4,3 mıllıonnan astam aǵash pen buta ósip tur, - delingen jaýapta.
Almatynyń ekologııa jáne qorshaǵan orta basqarmasy qalany kógaldandyrý jáne rekreatsııalyq aımaqtardy damytý jumystary jalǵasyp jatqanyn málimdedi.
– Osy maqsatta 2030 jylǵa deıingi jol kartasy bekitilgen. Onda jyl saıyn keminde 320 myń aǵash pen buta otyrǵyzý qarastyrylǵan. 2026 jyly aǵashtar men butalardy otyrǵyzý, qazir bar jasyl jelekke kútim jasaý, sanıtarlyq qyrqý, apatty aǵashtardy kesý jáne jasyl aımaqtardy qaıta jańǵyrtý boıynsha júıeli jumystardy jalǵastyrý josparlanyp otyr. Bul rette jumystardyń turaqtylyǵyna, qaýipsizdigine jáne qalalyq ortany jaqsartýǵa erekshe nazar aýdarylady, - dep málimdedi basqarmada.
Sondaı-aq vedomstvo ókilderi aǵashtar men butaqtardyń qulaýy, olardy kútip-ustaý jáne qaýipsizdigine qatysty jaýapkershilik Almatynyń jasyl jelekterin kútip-ustaý jáne qorǵaý qaǵıdalary boıynsha retteletinin eske saldy.
Qalany jasyl jelektermen qamtamasyz etý, onyń ishinde sanıtarlyq qyrqý men apatty aǵashtardy kesý boıynsha bıýdjettik baǵdarlamalardy aýdandyq ákimdikteriniń apparattary basqarýshy retinde júzege asyrady.
– Sonymen qatar zııan keltirilgen jaǵdaıda ony óteý máseleleri Qazaqstan Respýblıkasynyń azamattyq zańnamasyna sáıkes sheshilip, belgilengen sot tártibimen qaralatynyn habarlaımyz, - dep tolyqtyrdy basqarma.
Eske salaıyq, 2025 jylǵy shilde aıynda Almatyda qalany kógaldandyrýdy úılestiretin biryńǵaı ortalyq qurylatyny habarlanǵan edi. Jańa ortalyq – «Jasyl Almaty» KMM skverlerdi, gúlzarlardy, jaıaý júrginshiler kóshelerin jáne shaǵyn jasyl aımaqtardy ortalyqtandyrylǵan túrde kútip-ustaýmen aınalysady.
Buǵan deıin Almaty máslıhatynyń sessııasynda «Jasyl Almaty» mekemesiniń qyzmetin uıymdastyrý úshin qala bıýdjetinen 4,9 mlrd teńge bólingeni aıtylǵan.
Sondaı-aq osy aptada «Jasyl Almaty» basshysy bolyp Tımýr Eleýsizov taǵaıyndaldy.