Almatyda qansha adam avtoturaqty jeńildikpen paıdalanyp júr
ALMATY. KAZINFORM — Almatyda bekitilgen sanattaǵy turǵyndar avtoturaqty jeńildikpen paıdala alady.
«Almaty Parkıng» mekemesiniń málimetinshe, qalada 15 344 avtokólik ıesi kommýnaldyq aqyly avtoturaqtarda jeńildikterdi paıdalanyp júr. Jeńildik I jáne II toptaǵy múgedektigi bar azamattarǵa, Uly Otan soǵysynyń ardagerlerine, kópbalaly otbasylarǵa, Semeı ıadrolyq synaq polıgonyndaǵy synaqtardan zardap shekken otbasylardyń múshelerine beriledi. Bul múmkindik elektromobılder men arnaıy kólik quraldarynyń ıelerine de qarastyrylǵan.
— Basym baǵyttardyń biri halyqtyń áleýmettik osal toptary men jeńildik alýǵa quqyǵy bar basqa da sanattaǵy azamattar úshin avtoturaq ınfraqurylymynyń qoljetimdiligin qamtamasyz etý, — dep habarlady mekemeden.
Qazir qalada 17 myńnan astam kommýnaldyq avtoturaq orny bar. Aldaǵy ýaqytta olardyń sanyn 25 myńǵa deıin jetkizý josparlanyp otyr. Odan bólek kólik ıelerine qyzmet alý ýaqytyn únemdeý úshin jeńildikpen turaqtaýǵa arnalǵan ruqsattardy rásimdeý tártibin ońaılatý jáne tsıfrlyq servısterdi damytý kózdelgen.
Eske salaıyq, Almatynyń kommýnaldyq avtoturaqtarynda bıyl 4 qazannan bastap jańa tarıfter qoldanysqa engizildi. Jańa tártipke sáıkes, kólik qozǵalysy salystyrmaly túrde tómen ýchaskelerde tarıf burynǵydaı saǵatyna 100 teńge bolyp qaldy. Avtoturaqtarǵa suranys ortasha aýmaqtarda saǵatyna 150 teńge belgilendi. Al turaq oryndary tapshy ári kólik qozǵalysy joǵary, suranys eń kóp aımaqtarda tarıf saǵatyna 200 teńge boldy.
