Almatyda Kane Ýest kontsertine arnaıy avtobýstar júrip, metro ýaqyty uzartylady
ALMATY. KAZINFORM — 14 tamyzda Almatynyń Ortalyq stadıonynda ótetin Kane Ýest kontsertine oraı kórermenderdiń qaýipsizdigi men kólik qatynasyn qamtamasyz etý boıynsha arnaıy sharalar uıymdastyrylady.
Almaty ákimdiginiń málimetinshe, negizgi basymdyq qoǵamdyq kólik jumysyna beriledi. Іs-shara aıaqtalǵannan keıin qonaqtardy qalanyń alty baǵyty boıynsha 60 tegin shattl tasymaldaıdy. Kórermenderge qolaıly bolý úshin avtobýstar Ortalyq stadıonnan myna baǵyttarǵa qatynaıdy:
- Almaty Arena — 10 avtobýs;
- Raıymbek batyr / «Alataý» metro beketi — 10 avtobýs;
- Almaty-1 temirjol vokzaly — 5 avtobýs;
- «Orbıta» — 5 avtobýs;
- «Juldyz» shaǵyn aýdany — 10 avtobýs;
- Almaty halyqaralyq áýejaıy — 10 avtobýs.
Sonymen qatar qoǵamdyq kólik pen metropolıtenniń jumysy kúsheıtiledi. «Baıqońyr» metro beketi saǵat 21:00–de jolaýshylar úshin jabylady. Kontsertke kelýshilerge «Abaı» jáne «Muhtar Áýezov atyndaǵy teatr» beketterin paıdalaný usynylady. Metro jumysy keminde saǵat 01:00–ge deıin, al qajet bolǵan jaǵdaıda 03:00–ge deıin uzartylady.
Kontserttiń ótýine jáne qaýipsizdik sharalaryna baılanysty saǵat 16:00–den bastap Ortalyq stadıon mańynda kólik qozǵalysyna kezeń-kezeńimen shekteý engiziledi.
— Qaýipsizdik qyzmetteriniń sheshimi boıynsha jekelegen jol ýchaskeleri erterek jabylýy múmkin. Oqıǵa ornynda polıtsııa departamentiniń qyzmetkerleri kezekshilik atqaryp, jol qozǵalysyn baqylaýdy qamtamasyz etedi jáne kólik keptelisiniń aldyn alýǵa kómektesedi, — dep habarlady ákimdikten.
Buǵan deıin Almatyda Kane Ýest kontsertine baılanysty qaı kósheler jabylatynyn jazǵanbyz.
