Almatyda Kane Ýest kontserti ótetin kúni kólik qalaı qatynaıdy
ASTANA. KAZINFORM — 15 tamyzda Almatydaǵy Ortalyq stadıonda YE kontserti ótedi. Kórermenderdiń qaýipsizdigi men qolaıly júrip-turýyn qamtamasyz etý úshin qalada jol qozǵalysyn uıymdastyrý jáne qoǵamdyq kólik jumysyna qatysty qosymsha sharalar qabyldanady.
Almaty ákimdiginiń málimetinshe, qaýipsizdikti qamtamasyz etý maqsatynda saǵat 15:30–dan bastap Ortalyq stadıon mańynda kólik qozǵalysy kezeń-kezeńimen shektele bastaıdy. Sátbaev kóshesiniń Baıtursynov kóshesinen Baızaqov kóshesine deıingi bóliginde kólik qozǵalysy ýaqytsha toqtatylady.
Qaýipsizdik qyzmetteriniń sheshimimen stadıonǵa irgeles joldardyń jekelegen bólikteri de ýaqytsha jabylýy múmkin. Bul rette Abaı dańǵylyndaǵy qoǵamdyq kólik qozǵalysy qalypty rejımde júzege asyrylady.
Kólik aǵynyn retteý jáne keptelistiń aldyn alý úshin jergilikti jerlerde polıtsııa departamentiniń qyzmetkerleri kezekshilik atqarady.
— Kontsert aıaqtalǵannan keıin kórermenderdi qalanyń alty baǵyty boıynsha 60 tegin shattl tasymaldaıdy. Avtobýstar Ortalyq stadıonnan Almaty Arenaǵa, «Alataý» metro beketine (Raıymbek batyr mańy), Almaty-1 temirjol vokzalyna, Orbıta shaǵynaýdanyna, Juldyz shaǵynaýdanyna jáne Almaty halyqaralyq áýejaıyna qatynaıdy, — dep habarlady Almaty ákimdigi.
Sondaı-aq qoǵamdyq kólik pen metropolıten jumysy kúsheıtiledi. «Baıqońyr» metro beketi saǵat 21:00–de jolaýshylar úshin jabylady. Kontsertke kelýshilerge «Abaı» jáne «Muhtar Áýezov atyndaǵy teatr» stantsııalaryn paıdalaný usynylady. Metro jumysy keminde saǵat 01:00–ge deıin, al qajet bolǵan jaǵdaıda saǵat 03:00–ge deıin uzartylady.
Almaty turǵyndary men qala qonaqtaryna jol júrý baǵytyn aldyn ala josparlap, kólik qozǵalysyna engiziletin ýaqytsha shekteýdi eskerý jáne múmkindiginshe qoǵamdyq kólikti paıdalaný usynylady.
Eske salaıyq, Kane Ýest 14 tamyz saǵat 21:00-de ótýge tıis edi. Alaıda aýqymdy shoýdyń bastalýyna sanalýy mınýttar qalǵan kezde uıymdastyrýshylar kontsert bir kúnge shegerilgenin habarlady. Bul sheshim qaýipsizdik maqsatynda qabyldanǵan.
