Almatyda Kane kontsertine jalǵan bılet satqan azamat anyqtaldy
ALMATY. KAZINFORM — Almatyda Kane Ýest kontsertine jalǵan bılet satý deregi anyqtaldy.
Almaty polıtsııasynyń málimetinshe, álemdik juldyzdyń kontserti aldynda alaıaqtyq áreketteri kóbeıgen. Tártip saqshylary ınternet arqyly kontsert bıletterin zańsyz satýǵa tyrysqan azamatty anyqtady.
— Áleýmettik jelilerge júrgizilgen monıtorıng barysynda polıtsııa qyzmetkerleri aldaǵy kontsertke bılet satatyny týraly habarlandyrý jarııalaǵan jas jigitti anyqtady. Onyń zańsyz áreketiniń joly der kezinde kesilip, satyp alýshylardy aldap úlgergen joq. Aýqymdy is-sharalar qarsańynda polıtsııa qyzmetkerleri áleýmettik jelilerdi, habarlandyrý saıttaryn jáne ınternet-platformalardy táýlik boıy baqylap, alaıaqtyq derekteri men joǵary suranysty paıdalanyp zańsyz tabys tabýǵa baǵyttalǵan áreketterdi anyqtap keledi, — dep habarlady polıtsııadan.
Tártip saqshylary qala turǵyndary men qonaqtaryn bıletterdi tek resmı servıster arqyly satyp alýǵa, beıtanys adamdarǵa aqsha aýdarmaýǵa jáne ınternettegi kúmándi habarlandyrýlarǵa senbeýge shaqyrdy.
Eske salaıyq, Almatyda Kane Ýestiń kontsertine daıyndyq qalaı júrip jatqanyn jazǵanbyz.
