Almatyda kámeletke tolmaǵan qyzben jynystyq qatynasqa tústi degen kúdikti ustaldy

ALMATY. KAZINFORM — Almaty oblystyq Polıtsııa departamenti atalǵan derek boıynsha tergeý bastalǵanyn málimdedi.

— Polıtsııa qyzmetkerleri kúdiktini anyqtap, ustap, aýdandyq bólimshege jetkizdi. QR Qylmystyq kodeksiniń 122-baby boıynsha (Kórineý on alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketterdi jasaý, sol sııaqty kórineý kámeletke tolmaǵan adam kórsetetin jezókshelik qyzmetti, seksýaldyq sıpattaǵy ózge de qyzmetti alý) boıynsha qazirgi ýaqytta bolǵan oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý amaldary júrgizilip jatyr. Atalǵan sharalardyń nátıjesinde qoldanystaǵy zańnama aıasynda protsessýaldyq sheshim qabyldanatyn bolady, –– dep habarlady polıtsııadan.

Buqaralyq aqparat quraldarynda taraǵan aqparatqa súıener bolsaq, kúdikti dombyra úıirmesiniń muǵalimi, al qyz 14 jasta.

Osyǵan baılanysty oblystyq bilim basqarmasy túsinik berdi.

— Atalǵan jaǵdaıǵa keler bolsaq, bul kisiler Almaty oblysynyń turǵyndary emes, — dep atap ótti vedomstvodan.

Osyǵan deıin elimizde sońǵy bes jylda 18-ge tolmaǵan 12 myńdaı qyz júkti bolǵany týraly jazǵan edik.