Almatyda kámelet jasyna tolmaı sottalǵandar jatatyn mekeme ashyldy
ALMATY. KAZINFORM – Almaty qalasynda kámeletke tolmaǵan sottalǵandardy ustaýǵa arnalǵan qylmystyq-atqarý júıesiniń jańa mekemesi resmı túrde jumysyn bastady.
Іshki ister mınıstri Erjan Sadenov nysannyń jumysymen, sottalǵandardy ustaý jaǵdaılarymen tanysty. Joba memlekettik jáne jeke menshik sektordyń áriptestigi aıasynda ІІM QAJK, Almaty qalasy ákimdigi jáne jeke kompanııanyń qatysýymen júzege asyryldy. Oǵan memlekettik bıýdjetten qarjy ketken joq. 200 orynǵa eseptelgen bul mekemede sottalǵandarmen jumys halyqaralyq standarttarǵa saı júrgiziledi.
Bul – qylmystyq-atqarý júıesin jańǵyrtýdaǵy, sottalǵandardy qaıta áleýmettendirýdegi, Zań men Tártipti nyǵaıtýdaǵy mańyzdy qadam. Kolonııada jasóspirimderge arnalǵan qaýipsiz, zamanaýı jáne psıhologııalyq jaǵynan jaıly jaǵdaılar jasalǵan.
Ásirese bilim berý men áleýmettik jumysqa basa mán berilgen. Kámeletke tolmaǵan sottalǵandar BINOM mektebi men kolledjinde oqyp, suranysqa ıe mamandyqtardy meńgeredi: dánekerleý isi, tigin óndirisi, shashtaraz óneri jáne taǵy da basqa. Olarmen tárbıeshiler, psıhologtar jumys istep, jan-jaqty qoldaý kórsetedi.
Nysan aýmaǵynda:
• kitaphana men akt zaly;
• ashana men medıtsınalyq pýnkt;
• fýtbol alańy, basketbol zaly, workout-alańshasy;
• oqý synyptary men óndiristik sheberhanalar ornalasqan.
– Mundaı mekemeniń ashylýy - árıne, mańyzdy qadam. Biraq ony mereke retinde qaraýǵa bolmaıdy. Áńgime jasóspirimder týraly bolyp otyr, al bizdiń basty mindetimiz – bul mekemeniń tolmaýyna barynsha jaǵdaı jasaý. Profılaktıka, otbasymen jumys, bilim berý árdaıym jazadan buryn turýy tıis. Biz tek tártipti qamtamasyz etip qana qoımaı, balalardyń penıtentsıarlyq mekemege túsýine jol bermeıtin jaǵdaı jasaýymyz qajet, - dep atap ótti Іshki ister mınıstri Erjan Sadenov.
Bilim berý, kásibı daıarlyq, psıhologııalyq qoldaý sottalǵandarǵa qoǵamǵa qaıta oralǵanda ózgeristerge daıyn bolýǵa múmkindik beredi. Mundaı tásil jasóspirimderdiń bostandyqqa shyqqannan keıin ortaǵa beıimdelýine jáne quqyq buzýshylyqtardyń azaıýyna yqpal etedi.
Budan buryn Almatyda aryzdanýshyǵa tıesili 370 mln teńgeni ıemdenip alǵan sot oryndaýshysy sottalǵanyn jazǵan edik.