Almatyda «Kalmar oıyny» serıalyndaǵy alyp qýyrshaq paıda boldy
ALMATY. KAZINFORM — Almatydaǵy saýda-oıyn-saýyq ortalyqtarynyń biriniń aldynda áıgili «Kalmar oıyny» serıalyndaǵy En Hı esimdi qýyrshaqtyń eskertkishi ornatyldy.
Erekshe ınstallıatsııa qala turǵyndary men qonaqtarynyń qyzyǵýshylyǵyn týdyryp otyr. Qalalyqtar qýyrshaqpen sýretke túsý úshin arnaıy keledi. Nazar aýdararlyǵy — almatylyq qýyrshaqtyń túpnusqadan sál aıyrmashylyǵy bar: onyń beldemshesiniń tómengi bóligi qazaqy oıý-órnekpen bezendirilgen, bul músinge ulttyq sıpat berip tur.
Áıgili «Kalmar oıyny» — 2021 jyly jaryq kórgen ońtústik koreıalyq trıller janryndaǵy serıal. Rejısseri jáne stsenarıı avtory — Hvan Don-hek.
Serıal 2021 jyly 17 qyrkúıekte Netflix platformasynda jaryq kórip, birden álemdik hıtke aınaldy. Týyndyda áleýmettik teńsizdik, qaryzǵa batý, lýdomanııa sııaqty taqyryptar qozǵalady.
Ekinshi maýsymy 2024 jyldyń jeltoqsanynda shyqsa, 2025 jyly úshinshi maýsymy jaryq kórip, kórermenderdiń qyzyǵýshylyǵyn oıatyp, rekord ornatty. Qyzyǵy sol, jańa maýsymdaǵy keıbir oıyndar Ortalyq Azııa kóshpendileriniń ulttyq oıyndaryna qatty uqsaıdy.
Eske salaıyq, buǵan deıin Oqý-aǵartý mınıstrligi bul telehıkaıany kámeletke tolmaǵandar kórýge bolmaıtynyn málimdegen bolatyn.