Almatyda «Qalqaman» metro beketindegi tonnelderde rels tóseý jumystary bastalady
ALMATY. KAZINFORM – «Qalqaman» metro beketi aýmaǵynda tik josparlaý jumystary júrgizilip, keshendi abattandyrýǵa ázirlik bastaldy.
Ákimdiktiń málemitenshe, joba aıasynda aǵashtar men myńnan astam buta egý arqyly kógaldandyrý, júrginshilerge arnalǵan aımaqtar salý, jaryqtandyrý júıesin ornatý, avtoturaq oryndaryn, avtobýs turaǵy men aıaldama keshenderin salý josparlanǵan.
Bekettiń ishinde árleý jumystary aıaqtalýǵa jaqyn. Eskalatorlar men jedelsatylar ornatylǵan, jeldetý, beınebaqylaý jáne órtke qarsy qorǵaý júıelerimen qosa, ınjenerlik júıelerdi montajdaý jumystary aıaqtalyp keledi.
– Tonnelderdegi jumystar bekitilgen kestege sáıkes júrgizilip jatyr: sol jaq aralyq tonnel tolyq daıyn, al oń jaq tonnelde relsterdi túıispesiz tehnologııa boıynsha tóseý jumystary bastalady, - delingen habarlamada.
Qurylys nysanynda shamamen 400 maman eńbek etip jatyr. Bul jumysty 2026 jyldyń birinshi jartyjyldyǵynyń sońyna deıin aıaqtaý josparlanyp otyr.
Eske salaıyq, buǵan deıin «Qalqaman» metro beketiniń qurylysy qarjylandyrý birqalypty bólinse, 2026 jyldyń alǵashqy jartysynda aıaqtalatynyn habarlanǵanbyz.
Negizi stantsııany bastapqyda 2025 jyly ashý josparlanǵan edi. Onyń iske qosylýy táýligine jolaýshy sanyn 20 myń adamǵa arttyrady dep josparlanǵan. Alaıda keıin merzim 2026 jylǵa shegerildi.
Sonymen qatar 2030 jylǵa deıin «Barlyq» bazaryna deıin taǵy úsh beket salý kózdelgen. Onda iri kólik-logıstıkalyq torap – Batys avtovokzaly, LRT jáne metro beketteri bar kólik haby qurylmaq.