Almatyda «Qalqaman» metro beketi 1 jeltoqsanǵa deıin ashylmaq
ALMATY.KAZINFORM — Almaty metrosynyń jańa «Qalqaman» stantsııasyn 1 jeltoqsanǵa deıin iske qosý josparlanyp otyr.
Almaty ákimi Darhan Satybaldynyń aıtýynsha, qurylys-montaj tolyq aıaqtaldy. Qazir bekitilgen kestege sáıkes iske qosý-baptaý jumystary júrgizilip jatyr. Stantsııa aýmaǵy abattandyrylyp, shamamen 400 avtoturaq orny jasalǵan.
— Stantsııany 1 jeltoqsanǵa deıin iske qosýdy josparlap otyrmyz. Bul — qalanyń kólik ınfraqurylymyn damytýdaǵy mańyzdy qadam. Aldaǵy úsh jylda batys baǵytta taǵy úsh stantsııa salý qajet, — dedi Almaty ákimi.
Eske salaıyq, Almatyda «Qalqaman» beketiniń jobasy 2020 jyly qolǵa alyndy. 2022 jyly qurylys bastaldy.
Buǵan deıin beket qurylysymen aınalysyp jatqan kompanııa qarjylandyrý birqalypty bólinbegendikten, jumys qarqyny tómen bolǵanyn málimdedi: 2020 jyly — 190 mln teńge, 2021 jyly — 600 mln, 2022 jyly — múldem qarjy bólinbegen. Negizgi qarjy 2023 jyldan bastap túse bastaǵan: 9,2 mlrd (2023), 2,3 mlrd (2024), 28 mlrd (2025), al 2026 jyly taǵy 17 mlrd teńge qarastyrylǵan.
Negizi stantsııany bastapqyda 2025 jyly ashý josparlanǵan edi. Onyń iske qosylýy táýligine jolaýshy sanyn 20 myń adamǵa arttyrady dep josparlanǵan. Alaıda keıin merzim 2026 jylǵa shegerildi.
Sondaı-aq «Qalqaman» beketi 99%-ǵa daıyn ekeni aıtyldy.