Almatyda qalyń qar jaýdy
ALMATY. KAZINFORM — Almatyda 9 jeltoqsan kúni saǵat 22:30 shamasynda bastalǵan jaýyn-shashyn túnge qaraı qalyń qarǵa ulasty.
10 jeltoqsan tańǵy 07:00–degi málimet boıynsha qardyń qalyńdyǵy 35 santımetrge jetip, aılyq normanyń jartysyna jýyqtady.
Almaty ákimdiginiń málimetinshe, kólik qozǵalysynyń toqtaýsyz ári turǵyndardyń qaýipsiz júrip-turýy úshin kommýnaldyq qyzmet kúsheıtilgen tártipte jumys isteýge kiristi.
— Qalany qardan tazalaýǵa 2 728 jumysshy men 75 jedel brıgada tartyldy. Qala kóshelerine 923 arnaıy tehnıka shyqty, sonyń ishinde 228 qurama jol mashınasy kóktaıǵaqty boldyrmaý maqsatynda arnaıy qospa sebýge kiristi. Tehnıkalardyń júrisin qamtamasyz etý úshin 22 polıtsııa ekıpajy, sondaı-aq 10 evakýator men manıpýlıator jumyldyryldy, — delingen habarlamada.
Qalada jol men kósheniń jaǵdaıyn baqylaý úshin táýlik boıy kezekshilik qoıylǵan.
— Barlyq kommýnaldyq qyzmet qardy tolyq tazalaǵanǵa deıin kúsheıtilgen rejımde jumysyn jalǵastyra beredi, — dep habarlady qala ákimdigi.
Eske salaıyq, buǵan deıin Almatyda jaýyn-shashynǵa baılanysty kommýnaldyq qyzmet kúsheıtilgen jumys rejımine kóshkenin habarlaǵan edik.