Almatyda qalyń qar saldarynan bir táýlikte 62 jol apaty tirkeldi

ALMATY. KAZINFORM — Almatyda qalyń qar jaýyp, joldaǵy ahýal qıyndaı tústi. 

Ákimshilik polıtsııa basqarmasynyń málimetinshe, keshegi tústen búginge deıin qala joldarynda 62 jol-kólik oqıǵasy tirkelgen. Onyń ishinde 28 jol apatynan adamdar zardap shekken. Qaza tapqandar joq.

Qazirgi ýaqytta polıtsııa qyzmetkerleri kúsheıtilgen rejımde qyzmet atqaryp, jol jaǵdaıyn baqylaýda ustap otyr. Sonymen qatar olar qaladaǵy kommýnaldyq qyzmettermen birlesip jumys istep jatyr.

Polıtsııa departamenti júrgizýshilerge aýa raıyna baılanysty jyldamdyqty tómendetip, araqashyqtyqty saqtaýdy jáne qajet bolmaǵan jaǵdaıda jolǵa shyqpaýǵa keńes berdi.

Eske salaıyq, buǵan deıin Almatyda bir túnde 27 santımetr qar jaýǵanyn habarlaǵan edik.

Sınoptıkterdiń boljamynsha, 11 naýryz kúni kúndiz jaýyn-shashyn bolmaıdy, aýa temperatýrasy –6…–8 gradýs shamasynda bolady, keıin taǵy tómendeıdi.