Almatyda qaldyqty energııaǵa aınaldyratyn alǵashqy zaýyt salynady: joba qaı satyda

ALMATY. KAZINFORM — Almatyda turmystyq qaldyqtardy qaıta óńdep, energııaǵa aınaldyratyn alǵashqy zaýyttyń qurylysy josparlanyp otyr. Qazir joba iske asyrý kezeńine jaqyndap keledi. 

2025 jylǵy 29 tamyzda mınıstr Erlan Nysanbaev pen ınvestor tarap kelisimge qol qoıǵan. Qujatqa sáıkes, zaýyt táýligine 1 600 tonnaǵa deıin turmystyq qaldyqty óńdep, 60 megavatt elektr energııasyn óndire alady. Investıtsııa kólemi — 145 mlrd teńgeden asady.

Ekologııa mınıstrliginiń habarlaýynsha, kásiporynda Eýropalyq standarttarǵa saı emıssııa baqylaý júıesi ornatylady, al óndiris protsesi tolyqtaı avtomattandyrylǵan monıtorıng júıesi boıynsha baqylanbaq.

— Joba aıasynda 700-ge jýyq ýaqytsha jáne 120 turaqty jumys orny qurylady. Mamandar Qytaıda oqytylyp, keıin zaýyttyń úzdiksiz jumysyn qamtamasyz etedi, — delingen mınıstrliktiń habarlamasynda.

Almaty ekologııa jáne qorshaǵan orta basqarmasy Kazinform.kz tilshisine bergen jaýabynda jobanyń ázirshe daıyndyq satysynda ekenin málimdedi.

— Qazirgi ýaqytta ýákiletti memlekettik organdarmen jáne múddeli uıymdarmen jobalyq, tehnıkalyq jáne uıymdastyrýshylyq sheshimderdi kelisý boıynsha keshendi jumys istelip jatyr, — dep málimdedi basqarma ókilderi.

Vedomstvonyń málimetinshe, zaýyt qurylysy bastalmas buryn memlekettik ekologııalyq saraptama men qoǵamdyq tyńdaý ótkizý mindetti. Bul kezeńde turǵyndar men ekobelsendiler pikirin bildire alady.

— Barlyq qajetti rásim aıaqtalǵannan keıin ǵana qurylys merzimi men naqty iske asyrý kestesi bekitiledi, — dep habarlady Almaty ekologııa jáne qorshaǵan orta basqarmasy.

Eske salaıyq, buǵan deıin Almaty oblysynda kókónis pen jemisterdi óńdeıtin zaýyttyń qurylysy bastalǵanyn habarlaǵanbyz.