Almatyda qaldyqtardy basqarýdyń biryńǵaı monıtorıng júıesi engiziledi
ALMATY. KAZINFORM – Almatyda qaldyqtardy basqarýdyń biryńǵaı aqparattyq júıesi engizilip, qatty turmystyq qaldyqtardy shyǵarýǵa baqylaý kúsheıtiledi. Bul týraly Green Recycle qoqys suryptaý kesheni bazasynda ótken keńeste talqylandy.
Jıynǵa qoqys shyǵaratyn uıymdardyń ókilderi men aýdan ákimderiniń kóriktendirý jónindegi orynbasarlary qatysty.
Qazir qalada 20 qoqys shyǵaratyn uıym jumys isteıdi, 258 birlik arnaıy tehnıka tartylǵan. Olarǵa bes jyl merzimge jasalǵan kelisimsharttar negizinde jaýapkershilik aımaqtary bólinip, qyzmet kórsetý ýchaskeleri bekitilgen.
2025 jyldyń qorytyndysy boıynsha Almatyda 595 myń tonnadan astam qatty turmystyq qaldyq jınalyp, shyǵaryldy. Al 2026 jyldyń qańtar-aqpan aılarynda bul kórsetkish 77 myń tonnadan asty.
Talqylaý barysynda salany tsıfrlandyrý máseleleri basty nazarǵa alyndy. Almaty ákiminiń orynbasary Nurlan Ábdirahym GPS júıesi ornatylmaǵan ári «AQ Tártip» JShS ázirlegen avtomattandyrylǵan aqparattyq júıege qosylmaǵan tehnıkalardy tolyqtaı jabdyqtaýdy tapsyrdy.
– Bul júıe arqyly tehnıkanyń naqty ýaqyttaǵy ornalasýyn jáne qozǵalys baǵytyn baqylaýǵa bolady. Sonyń nátıjesinde belgilengen kesteden aýytqýlardyń aldyn alyp, zańsyz qoqys oryndarynyń paıda bolýynyń aldyn alady, - delingen habarlamada.
«Eco Almaty» JShS qaldyqtardyń tasymaly men qoqys shyǵaratyn uıymdardyń jumysyn qadaǵalaıdy.
Eske salaıyq, buǵan deıin Abaı oblysynda qaldyqtardy baqylaýdyń tsıfrlyq júıesi iske qosylǵanyn habarlaǵan edik.
