Almatyda qalanyń menshigine qaıtarylǵan nysandar qandaı maqsatta qoldanylyp júr
ALMATY. KAZINFORM – Almatyda sot arqyly qalaǵa qaıtarylǵan birneshe nysan senimgerlik basqarýǵa berildi.
Almaty qalasy memlekettik aktıvter basqarmasynyń málimetine sáıkes, 2023 jyldan beri sot arqyly 3 nysan megapolıs menshigine berilgen. Olardyń biri — Almaty áýejaıyndaǵy kommertsııalyq oryndar.
2023 jyly áýejaıdyń ishki termınalynda 30 kommertsııalyq úı-jaı Almaty qalalyq sotynyń azamattyq ister jónindegi sot alqasynyń qaýlysymen qalanyń kommýnaldyq menshigine qabyldanǵan.
— Elektrondyq saýda-sattyq nátıjelerine sáıkes, 2024 jyldyń 14 mamyrynan bastap áýejaıdyń úı-jaılary keıinnen satyp alý quqyǵynsyz 30 jyl merzimge «Almaty halyqaralyq áýejaıy» AQ-na senimgerlik basqarýǵa berildi. Senimgerlik basqarýshy áýejaı aýmaǵynda qyzmetter kórsetýge qol jetkizý qaǵıdalaryna sáıkes úı-jaılardy jalǵa berýge mindetti. Sondaı-aq jyl saıyn obektini senimgerlik basqarýdyń taza tabysy bóliginen jergilikti bıýdjetke keminde 200 mln teńge aýdarýǵa mindetti, — dep habarlady vedomstvo.
Kelesi nysan — Almaly aýdany, Raıymbek dańǵyly, 196 úı mekenjaıy boıynsha ornalasqan jyljymaıtyn múlik obektisi (jalpy aýdany 3974 sharshy metr). Ol Almaty qalasynyń mamandandyrylǵan aýdanaralyq ekonomıkalyq sotynyń 2023 jylǵy 27 qarashadaǵy sheshimi jáne qala ákimdiginiń 2024 jylǵy 25 sáýirdegi № 2/275 qaýlysy negizinde Almaty qalasynyń kommýnaldyq menshigine qabyldandy.
— Qazirgi ýaqytta atalǵan jyljymaıtyn múlik obektisi Almaty qalasy qoǵamdyq densaýlyq saqtaý basqarmasynyń «Medıtsınalyq jedel járdem qyzmetine» berildi, — dep habarlady basqarma.
Odan bólek Jetisý aýdany, Moskvın kóshesi, 41A úı mekenjaıynda ornalasqan jyljymaıtyn múlik obektileri (ákimshilik ǵımarat, óndiristik ǵımarat jáne qoıma) Almaty qalasynyń kommýnaldyq menshigine qabyldanǵan. Vedomstvo málimetinshe, qazirgi ýaqytta atalǵan obektilerdi senimgerlik basqarýǵa berý maqsatynda Almaty qalasynyń tıisti qaýlysyn qabyldaý josparlanǵan.
— Tıisti sheshimder qabyldanǵannan keıin, obektilerdi keıinnen satyp alý quqyǵynsyz básekelestik ortaǵa senimgerlik basqarýǵa berý úshin elektrondyq saýda-sattyq ótkiziletin bolady, — delingen jaýapta.
Eske salaıyq, 2023 jyly Qaırat Boranbaevqa tıesili bolǵan «Almaly» saýda ortalyǵy da memleketke berildi. Qazir onda balalarǵa arnalǵan alǵashqy Ǵylym mýzeıiniń qurylys júrip jatyr. Nysandy 2026 jyldyń jazynda ashý josparlanyp otyr.