Almatyda qalanyń Bas josparyn túzetý boıynsha qoǵamdyq talqylaýlar ótip jatyr
ALMATY. KAZINFORM — Almatyda megapolıstiń 2040 jylǵa deıingi damýyn aıqyndaıtyn qujat — qalanyń Bas josparyn túzetý jobasy boıynsha qoǵamdyq talqylaýlar bastaldy.
«Almatybasjospar» ǴZI» JShS bas dırektory Ashat Sádýov qala qujatyna engiziletin ózgerister týraly aıtty.
— Biz mektepke deıingi mekemelerdiń negizgi bóligi qalanyń ortalyq bóliginde shoǵyrlanǵanyn kórip otyrmyz. Osyǵan uqsas jaǵdaı mektepterge, sondaı-aq qoǵamdyq tamaqtaný nysandaryna da qatysty. Bul qalanyń búginde ortalyqqa qatty táýeldi, monoortalyqty qala retinde qalyptasqanyn bildiredi, — dedi Ashat Sádýov.
Onyń aıtýynsha, saýda nysandary, densaýlyq saqtaý jáne mádenıet mekemeleriniń kópshiligi qala ortalyǵynda jınaqtalǵan. Sondyqtan jańa jospar boıynsha turǵyndar negizgi qyzmetterdi 15 mınýttyq jerden ala alatyndaı qala polıortalyqtardy damytýǵa kóshedi.
— Qalanyń ortalyq bóligine túsetin kúshti azaıtý úshin damýdyń polıortalyqty modeli qabyldandy. Bul degenimiz — qazirgi jalpyqalalyq ortalyqtan bólek, jańa 4 ortalyq quramyz, — dedi ol.
Eske salaıyq, Bas jospardy qaıta qaraýǵa Memleket basshysynyń taý bókteri aımaǵynda qurylys salýǵa tyıym salý jónindegi tapsyrmasy sebep boldy. Jańartylǵan jobada Talǵar tas jolynan, Shyǵys aınalma avtojolynan, Ál-Farabı dańǵylynan, Saın jáne Jandosov kóshelerinen ońtústikke qaraı jańa kóppáterli turǵyn úı salýǵa, sondaı-aq eńisi 15 gradýstan asatyn betkeılerde qurylys júrgizýge tyıym salý normasy bekitilgen. Bul sharalar taý bókterin qorǵaýǵa baǵyttalǵan.
Odan bólek qujatta turǵyn úı qurylysynyń kólemin qaıta bólý, áleýmettik ınfraqurylymdy — mektepterdi, balabaqshalardy, medıtsınalyq jáne mádenı mekemelerdi damytý, sondaı-aq 2040 jylǵa qaraı halyq sanynyń 3,6 mln adamǵa deıin ósýi boljamyn eskere otyryp, jańa qoǵamdyq keńistikter qalyptastyrý kózdelgen.
Qoǵamdyq talqylaýlar 26 jeltoqsanǵa deıin jalǵasady.
Buǵan deıin Úkimet Almaty qalasynyń 2040 jylǵa deıingi Bas josparyn 2023 jyly bekitken bolatyn.