Almatyda qalany kógaldandyrýǵa arnalǵan jeke tálimbaq salynady
ALMATY. KAZINFORM – Almaty ákimdiginde qalanyń kógaldandyrý júıesin jetildirý jáne jeke tálimbaq qurý máselesine arnalǵan keńes ótti.
Qala ákimdiginiń málimetinshe, megapolıste qurylys pen kóriktendirý qarqynyna baılanysty jyl saıyn kóshetke degen suranys 1,4 mıllıonnan asady. Buǵan aǵashtar men butalar otyrǵyzý, sondaı-aq jasyl jelekti qalpyna keltirý jumystary kiredi.
- Qazirgi tańda Almatyda arnaıy tálimbaqtyń bolmaýy syrtqy jetkizýshilerge táýeldilikti kúsheıtip, kóshetterdiń baǵasy men jersiný sapasyna áser etip otyr. Qala basshysy ózindik tálimbaq bazasyn qalyptastyrý kógaldandyrý salasyn turaqtandyryp, qalalyq ortanyń sapasyn arttyrýdaǵy mańyzdy strategııalyq qadam ekenin atap ótti, - dep habarlady ákimdikten.
Joba aıasynda qalanyń ońtústik bóliginde birneshe ýchaskede tálimbaq ornalastyrý josparlanyp otyr. Sonymen qatar aýmaqty keńeıtý múmkindigi pysyqtalyp jatyr. Bul Almatyny klımatqa beıimdelgen kóshetterdi ósirip, ımportqa táýeldilikti azaıtýǵa múmkindik bermek.
Sondaı-aq zamanaýı agrotehnologııalardy engizý máselesi de nazarda. Atap aıtqanda, jylyna 1 mıllıonǵa deıin kóshet ósirýge múmkindik beretin mıkroklondyq kóbeıtý zerthanasyn qurý josparlandy.
- Keńes barysynda jobaǵa sheteldik ınvestorlardyń qyzyǵýshylyq tanytyp otyrǵany da belgili boldy. Qazirgi tańda seriktestik tetikteri men ınvestıtsııa tartý joldary qarastyrylyp jatyr, - dep naqtylady ákimdikten.
Eske salaıyq, byltyr Almatyda shamamen 370 myń buta jáne 5 myńnan astam iri kólemdi aǵash otyrǵyzyldy. 2026 jylǵy jospar boıynsha megapolıste 500 000 buta men 7 200 iri aǵash egilýi tıis.
