Almatyda qalalyq aktıv konstıtýtsııalyq reformanyń negizgi basymdyqtaryn talqylady
ALMATY. KAZINFORM — Almaty qalasynyń aktıvimen ótken kezdesýde qala ákimi Darhan Satybaldy konstıtýtsııalyq reformany iske asyrýdyń negizgi basym baǵyttaryn aıqyndady, dep habarlaıdy qalalyq ákimdiktiń baspasóz qyzmeti.
Іs-sharaǵa máslıhat depýtattary, aýdan ákimderi, basqarma basshylary jáne qalalyq qyzmetterdiń jetekshileri qatysty.
Darhan Satybaldy Memleket basshysy Qasym-Jomart Toqaevtyń usynysymen elimizde aýqymdy konstıtýtsııalyq reforma júrgizilip jatqanyn atap ótti. Jańa Konstıtýtsııa jobasy egemendik pen táýelsizdikti nyǵaıtýǵa, azamattardyń quqyǵy men bostandyǵyn qorǵaýǵa, zań ústemdigin qamtamasyz etýge, ulttyq birlikti damytýǵa jáne qazaqstandyqtardyń ál-aýqatyn arttyrýǵa baǵyttalǵan.
Almaty ákimi qujatta adamı kapıtaldy, bilim berýdi, ǵylym men ınnovatsııany memlekettik saıasattyń strategııalyq baǵyttary retinde damytý bekitilgenin erekshe atap ótti.
Sonymen qatar azamattardyń memlekettik basqarýǵa aralasý múmkindigi keńeıtilip, jergilikti ózin-ózi basqarýdyń róli kúsheıtiledi, sheshim qabyldaý úderisiniń ashyqtyǵy men memlekettik organdardyń jaýapkershiligi artady.
Qalalyq máslıhat tóraǵasy Meıirjan Otynshıev Qazaqstan Respýblıkasynyń jańa Konstıtýtsııasy jobasyn qoldaıtynyn bildirip, onyń eldiń odan ári damýy úshin mańyzyn jetkizdi.
— Qujat azamattar, saıası partııalar, qoǵamdyq uıymdar men sarapshylar qatysqan aýqymdy qoǵamdyq talqylaýdyń nátıjesi. Jańa Konstıtýtsııa jobasy qoǵamnyń saıası júıeni jańartýǵa jáne memleket pen azamattar aldyndaǵy ádilettilik pen jaýapkershilik qaǵıdattaryn nyǵaıtýǵa degen suranysyn kórsetedi, — dedi Meıirjan Otynshıev.
Kezdesý sońynda Almaty ákimi jańa Konstıtýtsııa jobasy boıynsha túpkilikti sheshim respýblıkalyq referendýmda qabyldanatynyn aıtyp, konstıtýtsııalyq ózgeristerdiń negizgi erejeleri men mánin halyqqa túsindirý baǵytynda barlyq deńgeıdegi atqarýshy jáne ókildi organnyń úılesimdi jumysynyń mańyzdylyǵyna nazar aýdardy.