Almatyda qala syrtyndaǵy lagerlerde balalardyń demalys maýsymy bastaldy

Almaty qalasy ákiminiń orynbasary Ásem Núsipovanyń aıtýynsha, bıyl balalardyń jazǵy demalysyn uıymdastyrý qala bıliginiń erekshe baqylaýyna alynǵan. Qaýipsizdik, tamaqtaný, bos ýaqytty tıimdi ótkizý, bilim berý jáne sporttyq baǵdarlamalar – barlyǵy balalardyń demalysyn kóńildi ári paıdaly ótkizýge baǵyttalǵan. 

– Almatyda mektep jasyndaǵy shamamen 350 myń bala bar. Bizdiń basty maqsatymyz – ár oqýshyǵa tolyqqandy ári mazmundy jazǵy demalys uıymdastyrý. Árıne, barlyq bala qala syrtyndaǵy lagerge bara almaıdy, biraq biz keminde 95% balany jazǵy túrli is-sharalarmen qamtýdy kózdep otyrmyz. Bıyl úsh myńǵa jýyq oqýshy qala syrtyndaǵy lagerlerge jiberiledi. Onyń ishinde 900 bala – Oqýshylar saraıynyń balansyndaǵy jalǵyz qalalyq lager sanalatyn «Órnek» lagerinde demalady. Bul balalardyń arasynda áleýmettik osal toptardan shyqqan, erekshe bilim berý qajettiligi bar, onyń ishinde múgedektigi bar balalar da bar, - dedi Ásem Núsipova.

Qazir Almaty qalasy men Almaty oblysynda 20-dan astam qala syrtyndaǵy saýyqtyrý lageri jumys istep tur. Olarǵa qala aýdandarynan balalar kezeń-kezeńimen jiberiledi.

– Ókinishke qaraı, qazirgi ınfraqurylymdyq múmkindikter jetkiliksiz. Balalardyń suranysy joǵary — olar jaıly jaǵdaı men mazmundy, erekshe formattaǵy demalys túrlerin qalaıdy. Sondyqtan balalardyń demalys ınfraqurylymyn damytý ákimdiktiń basym baǵyttarynyń biri, - dep atap ótti ákim orynbasary.

Onyń aıtýynsha, qala syrtyndaǵy lagerlerden bólek, shamamen 55 myń oqýshy mektep janyndaǵy lagerlerge qatysyp jatyr. Onda ystyq tamaq pen túrli oıyn-saýyq baǵdarlamalar qarastyrylǵan. Sonymen qatar bul jumysqa 17 kolledj tartyldy — onda jasóspirimderge kásibı baǵdar berý jumystary nazarǵa alyndy. Balalar túrli mamandyqtarmen tanysyp, sheberlik saǵattaryna qatysady.

Buǵan deıin habarlanǵandaı, bıyl mektep janyndaǵy lagerler erekshe mazmunmen jáne qyzyqty baǵdarlamalarmen ótip jatyr.