Almatyda qala ishinen 13 iri kásiporyn kóshiriledi
ALMATY. KAZINFORM — Almatyda qalanyń jańa Bas josparynyń strategııalyq ekologııalyq baǵalaýy boıynsha qoǵamdyq tyńdaýlar ótti.
Іs-shara barysynda Jetisý aýdanynyń turǵyny aýany lastaıtyn jáne turǵyndar úshin qolaısyzdyq týdyratyn qala ishindegi kásiporyndardyń bolashaǵy qandaı bolatynyn surady.
Bul suraqqa jaýap bergen bıotehnolog-ǵalym Gúlnur Júnisova jańa Bas josparda 13 úlken kásiporyndy qala syrtyna shyǵarý josparlanǵanyn atap ótti. Odan bólek 400-den astam kishi óndiris oryndary kóshirilmek.
— Onyń nátıjesinde 500 gektardaı jer bosatylady, — dedi ol.
Sondaı-aq qoǵamdyq tyńdaýlar barysynda turǵyndar halyq sanynyń artýy men turǵyn úı qurylysynyń qarqyndy júrýine baılanysty Almatyny aýyz sýmen qamtamasyz etý máselesine erekshe nazar aýdardy. Energetıka jáne sýmen jabdyqtaý basqarmasynyń basshysy Nurbaqyt Serikbaı bul baǵytta 2040 jylǵa deıingi uzaq merzimdi jospar aıasynda qandaı jumystar júrgizilip jatqanyn aıtty.
— Búginde sýmen jabdyqtaý máselesi eń aldymen Naýryzbaı aýdanynda jáne Bostandyq aýdanynyń keı bóliginde ózekti bolyp tur. Sý tapshylyǵynyń aldyn alý úshin jańa sý alý nysandaryn, súzgi stantsııalaryn salý, qoldanystaǵy sý kózderiniń qýatyn keńeıtý jáne ınjenerlik jelilerdi jańǵyrtý boıynsha birqatar joba júzege asyrylyp jatyr, — dedi basqarma basshysy.
Eske salaıyq, buǵan deıin Almatynyń bas jospary qoǵamdyq tyńdaýlary bastalǵanyn jazǵanbyz.
