Almatyda qala mańyna qatynaıtyn taǵy 8 jańa avtobýs baǵyty ashyldy
ALMATY. KAZINFORM – Almaty qalalyq mobıldilik basqarmasy Eńbekshiqazaq, Іle, Qarasaı jáne Jambyl aýdanyndaǵy eldi mekenderdi qamtıtyn 8 jańa marshrýt uıymdastyrdy.
Osylaısha, 13 qarashadan bastap tasymaldaýshy «NurjasTrans» JShS №218, 238, 246, 248, 250, 255 marshrýttaryna qyzmet kórsetýge kirisedi. «Tóle bı ıAssaýı avtobeketi – A.Toqpanov aýyly» baǵyty boıynsha №218 marshrýtta 5 avtobýs júredi. Qozǵalys 5:30 bastalyp, 23:00 aıaqtalady.
«Tóle bı ıAssaýı avtobeketi – Kóktóbe aýyly» baǵyty boıynsha №238 avtobýs júredi. Qozǵalystyń bastalýy – 5:30, aıaqtalýy – 23:00. «Barlyq bazary – Kemertoǵan aýyly» baǵyty boıynsha jolaýshylarǵa №246 avtobýs qyzmet kórsetedi. Qozǵalystyń bastalýy – 5:30, aıaqtalýy – 23:00», - dep habarlady ákimdikten.
Al, Barlyq bazarynan Sholaqqarǵaly aýylyna deıin №248 qoǵamdyq kólik qatynaıtyn bolady. Qozǵalystyń bastalýy – 6:00, aıaqtalýy – 22:00. «Mamyr-7 shaǵyn aýdanynan Qyrǵaýyldy aýylyna №250 avtobýspen jetýge bolady. Qozǵalystyń bastalýy – 5:30, aıaqtalýy – 23:00.
Almaty-1 temirjol vokzaly men Jaýǵashty aýyl arasynda №255 avtobýs júredi. Qozǵalystyń bastalýy – 5:30, aıaqtalýy – 23:00.
Sonymen qatar 11 qarashadan bastap «Jas Trans» JShS-ne №241 jáne №242 marshrýttary berildi.
«Jetisý bazary – Qoıshybek aýyly» baǵyty boıynsha №241, Jetisý bazary – Bazarkeldi aýylyna №242 avtobýstar júredi», - dep atap ótti ákimdikten.
Aıta ketý kerek, jolaýshylar men júkti avtokólikpen tasymaldaý erejesine sáıkes, atalǵan marshrýttar baıqaý ótkizilgenge deıin tasymaldaýshylarǵa ýaqytsha berilip, synaq rejıminde jumys isteıdi. Sonyń nátıjesinde jolaýshylardyń legi men turǵyndardyń qajettiligi eskerilip, qozǵalys syzbalaryna ózgerister engiziledi.
Osy kúnge Almatyda 41 qala mańy baǵyty ashylyp, olarǵa 491 avtobýs bólingen bolatyn.
Jyl sońyna deıin Almaty aglomeratsııasyndaǵy 70-ke jýyq eldi mekendi qamtıtyn taǵy 19 baǵyt ashý josparlanyp otyr.
