Almatyda qala kúnine arnalǵan merekelik is-sharalarǵa 1 mıllıonnan astam turǵyn qatysty
ALMATY. KAZINFORM — 19–20 qyrkúıek kúnderi Almatyda Qala kúnine arnalǵan aýqymdy merekelik is-sharalar ótti.
Baǵdarlamaǵa qalanyń basty alańdarynda, sondaı-aq barlyq 8 aýdan aýmaǵynda uıymdastyrylǵan kontsertter, festıvalder, kórmeler, sporttyq jáne shyǵarmashylyq jobalar endi. Eki kún ishinde merekelik sharalarǵa 1 mıllıonnan astam qala turǵyny men qonaǵy qatysty.
Osy kúnderi Abaı alańynda Almaty qalasynyń ákimi Darhan Satybaldynyń qatysýymen saltanatty kontsert ótip, «Almaty qalasynyń Qurmetti azamaty» ataǵyn tabystaý rásimi uıymdastyryldy. Sonymen qatar folklorlyq-etnografııalyq «Sazgen sazy» ansambli, Qazaq memlekettik tsırkiniń ártisteri, ASU toby jáne «Alataý» dástúrli óner teatry óner kórsetti. Kesh barysynda pıanıst Ratovich pen NE PROSTO ORCHESTRA kontserttik baǵdarlamalaryn usyndy. Merekeniń erekshe oqıǵalarynyń biri tanymal halyqaralyq balalarǵa arnalǵan D Billions mýzykalyq shoýynyń óner kórsetýi boldy. Ony myńdaǵan bala ata-analarymen birge tamashalady.
Alańda qala turǵyndary úshin taqyryptyq jáne balalarǵa arnalǵan aımaqtar, AI & ROBOT ZONE, kraft oıyndary alańy jáne kásibı sýretshilerdiń «Ajarly Almaty» kórmesi jumys istedi.
Astana alańynda kúndizgi kontserttik baǵdarlamalar, «Almaty Vibes» mýzykalyq festıvali jáne «Almaty Zhuldyzy» kontserttik baǵdarlamasy ótti. Sahnada elimizdiń tanymal juldyzdary óner kórsetti. Keshtiń basty oqıǵasy Almaty qalasynyń qalyptasý tarıhyna arnalǵan, zamanaýı vızýaldy tehnologııalar men mýzykalyq súıemeldeýdi úılestirgen áserli 3D Mapping Show boldy.
Panfılov jáne Jibek Joly kóshelerinde de merekelik sharalar uıymdastyryldy. Munda taqyryptyq aımaqtar jumys istep, kontsertter, shyǵarmashylyq baǵdarlamalar men qýyrshaq teatrynyń qoıylymy ótti. 60-tan astam baspa úıi men kitap dúkenin biriktirgen Kitap Fest kitap jármeńkesine eki kún ishinde 50 myńnan astam adam keldi.
Merekelik baǵdarlamanyń mańyzdy oqıǵalarynyń biri dástúrli Alma jármeńkesi boldy. Eki kún ishinde jergilikti óndirýshiler men sharýa qojalyqtary usynǵan almanyń 50-ge jýyq túri satylyp, jármeńkede 250 tonnadan astam alma ótkizildi.
«Alataý» dástúrli óner teatrynyń aldyndaǵy alańda «Án men kúıdiń besigi», «Jana Lep» jáne «Almatyǵa mahabbatpen» kontsertteri ótti. Baǵdarlamaǵa belgili ónerpazdar men shyǵarmashylyq ujymdar qatysty.
Merekeniń taǵy bir aıtýly oqıǵasy — Masanchı kóshesinde, Sátbaev dańǵylynan Abaı dańǵylyna deıingi aralyqta Almatydaǵy alǵashqy gastronomııalyq kósheniń ashylýy boldy. Jańa keńistik qoǵamdyq tamaqtaný oryndaryn, qalalyq ınfraqurylymdy jáne zamanaýı qoǵamdyq keńistikti biriktirip, qala turǵyndary men qonaqtary úshin jańa tartylys núktesine aınaldy.
Masanchı kóshesindegi gastronomııalyq kósheniń ashylýy Almatyda mamandandyrylǵan gastronomııalyq kósheler jelisin qalyptastyrý jobasynyń bir bóligi bolyp tabylady. Jańa formattaǵy keńistik turǵyndar men týrısterge zamanaýı qalalyq gastronomııanyń alýan túrimen tanysyp, jaıly ortada ýaqyt ótkizýge jáne Almatynyń ortalyq kósheleriniń jańa qyryn ashýǵa múmkindik beredi.
Sonymen qatar merekelik baǵdarlama Almatynyń barlyq 8 aýdanyn qamtydy. Turǵyndar úshin kontsertter, sporttyq jarystar, kórmeler, sheberlik sabaqtary, otbasylyq jáne balalarǵa arnalǵan is-sharalar, sondaı-aq túrli qoǵamdyq jáne mádenı jobalar uıymdastyryldy.
Osylaısha, Almatydaǵy Qala kúni túrli jastaǵy turǵyndar men qala qonaqtaryn biriktirgen aýqymdy merekege aınaldy. Eki kún boıy qalanyń túrli alańdarynda mýzyka, ulttyq mádenıet, zamanaýı óner, ádebıet, sport jáne otbasylyq demalys baǵyttary qamtylyp, turǵyndar men qonaqtarǵa mazmundy ári jarqyn merekelik baǵdarlama usynyldy.
