Almatyda qala kúnine 3D shoý uıymdastyrýǵa 200 mln teńge jumsalady
ALMATY. KAZINFORM – Qyrkúıektiń ár úshinshi jeksenbisinde Almatyda qala kúni atap ótiledi.
Megapolıs merekesi úshin Almaty ákimdigi bıyl qomaqty qarajat jumsaýdy josparlap otyr. Máselen, memlekettik satyp alý saıtynda aýdıovızýaldy 3D Mapping Show (proektsııalyq shoý) uıymdastyrý jáne ótkizý boıynsha habarlandyrý jarııalanǵan. Tapsyrys berýshi - qalalyq mádenıet basqarmasy.
Onyń tehnıkalyq erekshelikterine sáıkes, keminde 7 mınýt bolatyn shoý 19-20 qyrkúıekte «Astana» alańy, QBTÝ ǵımaratynyń qasbetinde uıymdastyrylady. Onyń sońynda 7 mınýttyq salıýt atylýy tıis. Іs-sharaǵa keminde 20 dana kásibı lazerlik proektor, keminde 50 robottandyrylǵan jaryq aspaby jáne ózge de jabdyqtar qoldanylýy qajet. Bul lot úshin 198 275 862 teńge qarastyrylǵan. Ótinimderdi qabyldaýdy aıaqtaýdyń aldyn ala merzimi - 4 qyrkúıek.
Odan bólek memlekettik satyp alý saıtynda Almaty kúnin merekeleýdi uıymdastyrýǵa arnalǵan birneshe habarlandyrý bar. Olardyń biri - 70 mln teńge, ekinshisi - 80 mln teńge jáne taǵy biri - 36 mln teńge.
Olarǵa Abaı alańynda ártúrli ýaqyt uzaqtyǵymen kontsert ótkizý, alańdy daıyndaý jáne basqa da jumystar kiredi.
Eske salaıyq, 2024 jyly Almatyda Respýblıka kúnin merekeleý aıasynda Abaı alańynda drondar shoýy ótti.
2025 jyly Almatyda Uly Jeńistiń 80 jyldyǵyna arnalǵan drondar shoýy uıymdastyryldy.
