Almatyda qala kúni qarsańynda birneshe áleýmettik nysan ashyldy
ALMATY. KAZINFORM — Almatyda áleýmettik nysandardyń saltanatty ashylýy ótti.
Qala kúni qarsańynda Almatyda erekshe bilim berý qajettiligi bar balalarǵa arnalǵan jańa «Januıa» mamandandyrylǵan kesheni saltanatty túrde ashyldy. Nysan qala ákimdigi men ınvestor seriktestigi aıasynda salyndy. Jobanyń jalpy ınvestıtsııa kólemi — 6 mlrd teńge. Jańa keshen Medeý aýdanynda ornalasqan.
— Búginde qalanyń ınfraqurylymy, ásirese bilim berý salasy qarqyndy damyp otyr. Osy oqý jylynda 12 jańa mektep pen ınnovatsııalyq shyǵarmashylyq ortalyqtary ashyldy. Al «Januıa» aıryqsha keshen. Munda erekshe kútimdi jáne arnaıy bilim berýdi qajet etetin balalar úshin barlyq múmkindik bar. Oqý, damý jáne áleýmettený úshin jaǵdaı jasalǵan, — dedi qalalyq bilim basqarmasynyń basshysy Saıran Saıfedenov.
Mamandandyrylǵan «Januıa» kesheniniń dırektory Marına Dáýletbekova mekeme jumysy týraly baıandady.
Sondaı-aq Almaty qalasynyń mereıtoıy qarsańynda Medeý aýdanynda ornalasqan № 2 Mamandandyrylǵan balalar úıi kúrdeli jóndeýden keıin óz esigin qaıta ashty. Ǵımarat tolyqtaı jańartylyp, zamanaýı talaptarǵa sáıkes keltirildi. Balalardyń jaıly ómir súrýine, qaýipsiz ortada ósýine jáne jan-jaqty damýyna qolaıly jaǵdaı jasaý maqsatynda mekeme jańa jıhazdarmen jabdyqtaldy.
Odan bólek № 5 qalalyq klınıkalyq aýrýhana bazasynda jańa medıtsınalyq ortalyqtar ashylyp, zamanaýı dıagnostıkalyq emdeý ádisteri engizildi. Bul myńdaǵan almatylyqqa medıtsınalyq kómekti jyldam ári sapaly alýǵa múmkindik beredi.
Aýrýhanada Profılaktıkalyq skrınıng ortalyǵy jumysyn bastady. Endi turǵyndar bir saǵat ishinde «bir tereze» qaǵıdasy boıynsha keshendi tekserýden ótip, mamandardyń keńesin ala alady. Mundaı tásil aýrýlardy erte anyqtaý men densaýlyqty saqtaýǵa aıtarlyqtaı múmkindik beredi.
Sonymen qatar gepatologııa jáne endoskopııa ortalyǵy quryldy. Ortalyqta baýyr men asqazan-ishek joly aýrýlaryn erte kezeńde anyqtap, tıimdi em taǵaıyndaýǵa kómektesetin zamanaýı fıbroskanerleý apparaty ornatyldy.
Eske salaıyq, buǵan deıin almatylyqtar qala kúnin qalaı atap ótetinin jazǵanbyz.