Almatyda qala bazarlaryna et jetkizý kólemi eki esege artty
ALMATY. KAZINFORM — Saýda jáne ıntegratsııa mınıstri Arman Shaqqalıev Almatydaǵy «Túrksib» bazaryna baryp, áleýmettik mańyzy bar azyq-túlik taýarlaryn keńeıtilgen kólemde jetkizý jumystary jáne baǵany turaqtandyrý sharalarymen tanysty.
Sapar qala turǵyndaryn sapaly ári qoljetimdi azyq-túlikpen qamtamasyz etýge baǵyttalǵan júıeli jumystyń aıasynda ótti.
Búginde «Túrksib» bazarynda taýar jetkizý kóleminiń turaqty ósýi baıqalady. Jergilikti atqarýshy organdardyń málimetinshe, bıyl fermerlerden tikeleı jetkiziletin et kólemi eki esege artqan. Buǵan deıin aı saıyn 230–250 bas et ákelinse, qazir bul kórsetkish 500 bastan asty. Óndirýshilermen tikeleı kelisimsharttardyń keńeıýi usynysty arttyryp, et ónimderiniń baǵasyn turaqtandyrýǵa naqty múmkindik berdi.
Bazar tolyq jańǵyrtylyp, saýda jáne sanıtarlyq talaptarǵa sáıkes keledi. Ónim sapasyn kúndelikti baqylaý arqyly tekseretin zamanaýı veterınarlyq-sanıtarlyq zerthana jumys isteıdi. Sondaı-aq taýarlardy saqtaý úshin arnaıy tońazytqysh jáne muzdatqysh kameralar ornatylyp, barlyq qajetti temperatýralyq rejımder saqtalady.
Áleýmettik mańyzy bar azyq-túlik taýarlaryn jetkizý úshin arnaıy saýda alańy uıymdastyrylǵan. Munda ónimder Almaty oblysy, Jetisý, Shyǵys Qazaqstan, Pavlodar, Túrkistan oblystary jáne shetel fermerlerinen tikeleı jetkiziledi. Júk kólikterine arnalǵan jeke avtoturaq qarastyrylǵan, bul logıstıkany jeńildetip, ásirese maýsymaralyq kezeńde assortımentti ýaqtyly tolyqtyrýǵa múmkindik beredi.
— Inflıatsııany ekonomıkalyq turǵydan negizdelgen deńgeıge deıin tómendetý úshin baǵanyń ósýin tejeıtin jáne negizsiz qymbattaýdyń aldyn alatyn keshendi sharalar qabyldanýda. Barlyq qoljetimdi mehanızmder halyqqa azyq-túlik baǵasynyń turaqtylyǵyn jáne qoljetimdiligin qamtamasyz etý úshin qoldanylyp jatyr, — dedi Arman Shaqqalıev.
2026 jyldyń basynan beri Almaty qalasynda áleýmettik mańyzy bar azyq-túlik taýarlarynyń tutyný baǵalary ındeksi 0,2%-dy qurady. Baǵany odan ári turaqtandyrý maqsatynda qala ákimdigi keshendi sharalar iske asyrýda. «Aınalym» qaryzdary men «forvardtyq» kelisimsharttar aıasynda 26 myń tonna ónim jetkizilgen, onyń ishinde kókónister, kúrish, taýyq eti, jumyrtqa jáne qant bar. Qosymsha bólingen 8 mlrd teńge esebinen sút, et jáne bakaleıa ónimderiniń jetkizilimin arttyrý, sondaı-aq maýsymaralyq kezeńde Túrkistan oblysy men Ortalyq Azııa elderinen erte pisetin kókónisterdi jetkizý josparlanýda.
«Demalys kúnderi» jármeńkeleriniń formaty da belsendi damyp keledi. 2026 jyldyń sońyna deıin myńnan astam jármeńke ótkizý josparlanǵan, bul ótken jylmen salystyrǵanda 2,5 ese kóp. Áleýmettik pavılondardy jańǵyrtý, olardyń aýmaǵyn keńeıtý jáne jańa saýda núktelerin ashý kózdelgen.
Memlekettik baqylaý aıasynda jyl basynan beri óńirlik komıssııa otyrystary ótkizildi, áleýmettik mańyzy bar taýarlarǵa 15%-dyq shekti saýda ústemesin asyrǵany úshin ákimshilik hattamalar toltyrylyp, aıyppuldar salyndy. Qazirgi ýaqytta azyq-túlik bazarlarynda, «úı janyndaǵy» dúkenderde jáne kókónis pavılondarynda tekserister jalǵasýda, kásipkerler arasynda túsindirý jumystary kúsheıtilgen.
Aıta ketelik Almaty qalasy men oblysynda bazarlardy jańǵyrtý jumysy qalaı júrip jatqany týraly jazǵan edik.