Almatyda qala arqyly ótetin negizgi ózenderde kóshkin qaýpiniń kartasy ázirlenedi

ALMATY. KAZINFORM – Almaty arqyly ótetin negizgi ózenderde kóshkin qaýpiniń kartasy ázirlenedi. Qala ákimdigi osylaısha taý bókterindegi zańsyz qurylysty toqtatýdy kózdep otyr. Bul týraly qalalyq máslıhattyń kezekti sessııasynda aıtyldy.

Almaty qalasy seısmıkalyq qaýipsizdik jáne jumyldyrý daıyndyǵy basqarmasy basshysynyń mindetin ýaqytsha atqarýshy Temirlan Japarbektiń sózinshe, osy jyldyń naýryz-shilde aıy aralyǵynda qalanyń 5 aýdanynyń ákimdikterimen birlesip kóshkin máselesi boıynsha jıyn ótti.

Onda taý bókterindegi eldi mekenderdiń jaı-kúıin zerttelip, nátıjesinde sel men kóshkin qaýpi joǵary ýchaskelerde qurylys júrgizýge tyıym salý týraly sheshim shyǵaryldy.

«Taý bókterlerinde qurylys salý máselelerin sheshý maqsatynda uzaq merzimdi perspektıvada Almaty arqyly ótetin tórt negizgi ózende – Úlken jáne Kishi Almaty, Qarǵaly jáne Aqsaı kóshkin qaýpi kartasyn jasaýǵa bıýdjettik ótinim joldandy. Joba 3 jylǵa eseptelgen», – dedi Temirlan Japarbek.

Sonymen qatar, basqarma aýdan ákimdikterimen birlesip, kóshkin qaýpi bar ýchaskelerdi joıý úshin jobalyq sheshimder daıyndady.

Bul jumystar osy jyldyń sońyna deıin aıaqtalady.

Buǵan deıin Erbolat Dosaev Almatyda asa qaýipti 11 ýchaskege baılanysty shara qoldanylyp jatqanyn aıtqan edi.

Eske salaıyq, 8 aqpan kúni Medeý aýdanynyń «Taý samaly» shaǵyn aýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini boldy.