Almatyda IT salasyna 19,2 mln dollar ınvestıtsııa tartyldy

ALMATY. KAZINFORM – Elimizdegi IT kompanııalarynyń úshten biri Almatyda ornalasqan.

Almaty ákimdiginen atap ótkendeı, megapolıs dástúrli túrde forým ótkiziletin orynǵa aınaldy. Osy joly Digital Almaty-2025 tsıfrlyq forýmyna 300-den astam halyqaralyq sarapshylar qatysyp jatyr.

– Qazaqstannyń IT-kompanııalarynyń úshten biri Almatyda shoǵyrlanǵan. Qala basshysynyń tapsyrmasy boıynsha iske asyrylǵan aqyldy qalalardy, jasandy ıntellektti, úlken derekterdi jáne turaqty damýdy qosa alǵanda, negizgi baǵyttardaǵy startaptardy damytýǵa jáne qoldaýǵa baǵyttalǵan Almatynyń ІT-ekojúıesin damytý baǵdarlamasynyń arqasynda tartylǵan ınvestıtsııalardyń jalpy somasy 19,2 mln dollarǵa jetti, al startaptardyń jıyntyq tabysy 5,37 mlrd teńge. 2 049 jumys orny ashyldy,– dep habarlady ákimdikten.

Akseleratsııalyq jáne ınkýbatsııalyq baǵdarlamalar 309 startapty sátti aıaqtady, onyń 16-sy halyqaralyq naryqtardaǵy satylymdardy rastady.

Sonymen qatar, Almatyda Qazaqstanda alǵash ret qala turǵyndarynyń qaýipsizdigin qamtamasyz etý úshin vıdeosaraptama men jasandy ıntellekt paıdalanyldy.

– 2023 jyly ákimdik memlekettik bilim berý jáne mektepke deıingi mekemelerde keshendi qaýipsizdik júıesin engizdi. Almatynyń tabysty tájirıbesin qabyldaı otyryp, elimizdiń basqa óńirleri de osy tehnologııany engize bastady. Biryńǵaı vıdeomonıtorıng júıesiniń jobasy aıasynda jyl sońyna qaraı biryńǵaı jelige biriktirilgen qalalyq kameralar sany 70 myńǵa deıin ulǵaıady,– dep atap ótti ákimdikten.

Halyqaralyq Digital Almaty forýmy aıasynda megapolıstiń tsıfrlyq egizi qashan daıyn bolatynyn aıtyldy. 

Eske salaıyq, Almatyda Digital Almaty-2025 tsıfrlyq forýmy ótip jatyr. Oǵan 40 myńnan asa adam qatysýda.